Cur síos ar an bpost

Is í seirbhís ateangaireachta institiúidí an Aontais Eorpaigh an tseirbhís ateangaireachta is mó ar domhan – cinntíonn na hateangairí comhdhála go ndéantar an plé a tharlaíonn le linn cruinnithe a thiontú go dílis go teanga oifigiúil de chuid an Aontais; úsáidtear an ateangaireacht chomhuaineach nó an ateangaireacht leantach chuige sin. 

Bíonn ateangairí an Aontais ag obair i dtimpeallacht spreagúil ilchultúrtha. Ní mór dóibh a bheith in ann cumarsáid éifeachtach a dhéanamh, saincheisteanna éagsúla agus casta a thuiscint, freagairt agus oiriúnú go tapa do dhálaí athraitheacha, agus oibriú faoi bhrú chomh maith. 

Na cáilíochtaí atá de dhíth

Ní mór duit eolas críochnúil a bheith agat ar cheann amháin de theangacha an Aontais Eorpaigh, sáreolas ar dhá cheann eile ar a laghad, maille le cáilíocht chuí san ateangaireacht chomhdhála; mar rogha air sin, ní mór duit céim a bheith agat maille le bliain amháin nó níos mó de thaithí ghairmiúil. D’fhéadfadh sé go n-athródh na cáilíochtaí atá de dhíth, mar sin ní mór na riachtanais shonracha a sheiceáil gach uair a fhoilsítear próiseas roghnúcháin.

Féadfar saor-ateangairí a fhostú le bheith ag obair i dteannta ateangairí foirne. Tá eolas ar fáil ar an suíomh gréasáin tiomnaithe maidir le conas post mar shaor-ateangaire a fháil leis an gCoimisiún Eorpach, le Parlaimint na hEorpa agus le Cúirt Bhreithiúnais na hEorpa: ‘A bheith ag obair mar shaor-ateangaire leis an Aontas’.

Tá tuilleadh eolais ar fáil maidir leis na próisis roghnúcháin agus leis na catagóirí éagsúla foirne.

Ina theannta sin, is féidir breathnú ar na deiseanna fostaíochta atá ar fáil nó breathnú ar leathanach na dtréimhsí oiliúna.