Catagóirí foirne an Aontais Eorpaigh
Cuireann an tAontas Eorpach poist ar fáil i gcatagóirí éagsúla foirne: oifigigh bhuana, baill foirne ar conradh agus baill foirne shealadacha, saineolaithe náisiúnta ar iasacht, oiliúnaithe agus baill foirne eile.
Cliceáil ar na clibeanna thíos chun tuilleadh sonraí maidir le fostaíocht a fháil le haghaidh gach catagóire foirne.
Is féidir leat breathnú ar an rannán ‘Próiseas roghnúcháin’ chomh maith chun tuilleadh eolais a fháil faoi na próisis roghnúcháin i ngach catagóir foirne.
Bain triail as na trialacha samplacha féachaint cé na scileanna atá agat cheana, mar aon le scileanna eile a d’fhéadfadh a bheith ag teastáil chun pas a fháil sa phróiseas roghnúcháin.
Is féidir leat tuilleadh eolais a fháil freisin faoi phróifílí éagsúla EU Careers agus faoi na deiseanna fostaíochta atá ar fáil.
- Foireann bhuan
- Baill foirne ar conradh
- Baill foirne shealadacha
- Oiliúnaithe
- Saineolaithe náisiúnta ar iasacht
- Eile
Is éard atá san fhoireann bhuan baill de státseirbhís an Aontais Eorpaigh a cheaptar ar feadh tréimhse gan téarma. Is iadsan an croílucht saothair.
Tá 3 chatagóir ann maidir le hoifigigh bhuana de chuid an Aontais: Riarthóirí (AD), Cúntóirí (AST), agus Rúnaithe/Cléirigh (AST/SC).
Riarthóirí
Oibríonn riarthóirí i réimse earnálacha, mar shampla an ceartas, an dlí, an t-airgeadas, an comhshaol agus an t-athrú aeráide, gnóthaí eachtracha, an talmhaíocht, an eacnamaíocht, teicneolaíocht na faisnéise, an chumarsáid, acmhainní daonna, an eolaíocht, an t-aistriúchán agus an ateangaireacht.
Ar na dualgais a bhíonn orthu tá forbairt beartais, anailís, cúraimí rialála, caibidlíocht idirnáisiúnta, plé le geallsealbhóirí, agus téacsanna dlíthiúla an Aontais a dhréachtú agus a sheiceáil.
Scála idir grád AD 5 agus grád AD 16 a bhíonn i gceist i ngairmréim an riarthóra, agus is é AD 5 an grád tosaigh le haghaidh céimithe ollscoile; Is leis na hArd-Stiúrthóirí amháin a bhaineann na gráid AD 15 agus AD 16.
D'fhéadfaí thú a roghnú agus a earcú ag gráid níos airde, AD 6 nó AD 7, i leith próifílí a bhfuil speisialtóireacht ag baint leo. Sa chás sin, beifear ag súil go mbeidh roinnt blianta d’oideachas ábhartha ag iarrthóirí agus beidh taithí oibre ag teastáil le haghaidh formhór na bpróifílí.
Tá na gráid AD 9 go dtí AD 12 ag teastáil le haghaidh na bpost meánbhainistíochta. Ní féidir duine a roghnú agus a earcú ag na gráid níos airde sin mura bhfuil taithí bainistíochta aige cheana.
Cúntóirí
Is gnách cúntóirí a fhostú i ról feidhmiúcháin nó teicniúil, agus soláthraíonn siad tacaíocht i réimsí éagsúla, mar shampla an t-airgeadas, an chumarsáid, an riarachán, an taighde, teicneolaíocht na faisnéise nó cur chun feidhme beartais, gan ach beagán a lua.
Scála idir grád AST 1 agus grád AST 11 a bhíonn i gceist le gairmréim an chúntóra, agus is ag na gráid AST 1 nó AST 3 a théann baill foirne i gceann oibre de ghnáth.
Rúnaithe/Cléirigh – Baill foirne tacaíochta
Is gnách go mbíonn rúnaithe agus cléirigh ag plé leis an mbainistíocht oifige agus ag soláthar tacaíocht riaracháin agus theicniúil. Ar na dualgais a bhíonn orthu, tá doiciméid agus comhaid a bhailchríochnú; tacú le gníomhaíochtaí an aonaid nó na roinne (cruinnithe, taisteal oifigiúil, an dialann); faisnéis a thiomsú agus a scaipeadh (bunachair sonraí agus comhaid a nuashonrú); cúraimí láimhe a dhéanamh.
Scála ó ghrád AST/SC 1 go grád AST/SC 6 a bhíonn ann do ghairmréim an rúnaí/an chléirigh. Is ag grád AST/SC 1 nó AST/SC 2 a théann baill foirne nua i gceann oibre de ghnáth.
Tá tuilleadh eolais le fáil sa tábla tuarastail seo (infheidhme ón 1 Eanáir 2024).
Féach leat tuilleadh eolais faoi na próisis roghnúcháin agus faoi na deiseanna fostaíochta atá ar fáil le haghaidh baill foirne bhuana.
Is féidir a bheith ag obair leis an Aontas Eorpach ar chonradh ar théarma seasta.
Bíonn roinnt cúraimí láimhe nó riaracháin á ndéanamh ag gníomhairí (nó baill foirne) ar conradh, agus d’fhéadfadh sé go gcuirfidís acmhainneacht bhreise ar fáil i réimsí speisialtóireachta nuair nach mbíonn líon leordhóthanach oifigeach ar fáil.
Is iondúil go n-earcaítear iad le haghaidh conarthaí ar théarma seasta (6 bliana ar a mhéad in aon institiúid de chuid an Aontais), ach i gcásanna áirithe is féidir conarthaí a thairiscint dóibh a bhfuil tréimhse éiginnte ag gabháil leo (in oifigí, gníomhaireachtaí, toscaireachtaí nó ionadaíochtaí).
Ciallaíonn an focal CAST ‘uirlis um roghnú ball foirne ar conradh’, agus ciallaíonn Buan gur roghnúchán é nach bhfuil dáta clabhsúir ná sprioc-am le haghaidh iarratas ag dul leis.
Bíonn poist CAST Buan ar fáil le haghaidh réimse leathan próifílí poist. Sa roghnúchán seo, is ar phróifíl a dhéanann na hiarrthóirí iarratas, seachas ar phost sonrach.
Is féidir le hinstitiúidí, comhlachtaí agus gníomhaireachtaí an Aontais baill foirne ar conradh a earcú chun poist shonracha a líonadh trí fholúntais ad hoc le haghaidh baill foirne ar conradh. Sa chás sin, leagtar síos sprioc-am le haghaidh iarratas do gach folúntas.
De réir mar a bhíonn gá le baill foirne ar conradh, d’fhéadfadh sé go bhfoilseofaí folúntais ad hoc le haghaidh réimse leathan próifílí, mar shampla stiúrthóirí gréasáin, oifigigh bheartais, teangeolaithe, comhordaitheoirí tionscadail, oifigigh slándála, bainisteoirí innealtóireachta eolaíche, tiománaithe, speisialtóirí sa chumarsáid, taighdeoirí, gan ach cuid acu a lua.
Gheobhaidh tú tuilleadh eolais faoin bpróiseas iarratais ar an leathanach faoin bpróiseas roghnúcháin.
Na hiarrthóirí sin ar éirigh leo conradh a fháil, earcófar go ceann tréimhse shocraithe iad. D’fhéadfaí síniú go ceann tréimhse éiginnte a chur leis na conarthaí i gcuid de chomhlachtaí agus gníomhaireachtaí an Aontais.
Roinntear na poist le haghaidh baill foirne ar conradh ina gceithre ghrúpa feidhme (leibhéil ghairme):
| Grúpa Feidhme | Grád | Cúraimí |
| Grúpa Feidhme IV | 13 go 18 | Cúraimí riaracháin, comhairleacha, teanga agus cúraimí teicniúla coibhéiseacha a dhéanfar faoi mhaoirseacht oifigeach nó baill foirne sealadacha. |
| Grúpa Feidhme III | 8 go 12 | Cúraimí feidhmiúcháin, dréachtú, cuntasaíocht agus cúraimí teicniúla coibhéiseacha eile, a dhéanfar faoi mhaoirseacht oifigeach nó ball foirne sealadach. |
| Grúpa Feidhme II | 4 go 7 | Cúraimí cléireachais agus rúnaíochta, bainistíocht oifige agus tascanna coibhéiseacha eile, a chomhlíonfar faoi mhaoirseacht oifigeach nó ball foirne sealadach. |
| Grúpa Feidhme I | 1 go 3 | Cúraimí a dhéantar de láimh agus cúraimí seirbhíse tacaíochta riaracháin a dhéanfar faoi mhaoirseacht oifigeach nó ball foirne sealadach. |
Tá tuilleadh eolais le fáil sa tábla tuarastail seo (infheidhme ón 1 Eanáir 2024).
Féach na próisis roghnúcháin CAST atá ar oscailt le haghaidh iarratas.
Earcaítear baill foirne shealadacha chun poist fholmha in institiúidí agus i ngníomhaireachtaí an Aontais a líonadh ar feadh tréimhse ama shocraithe; d’fhéadfadh sé go mbeadh roinnt míonna nó roinnt blianta i gceist leis sin.
D’fhéadfadh sé go n-iarrfaí orthu tascanna rialála, dlíthiúla, eolaíocha nó tacaíochta airgeadais a dhéanamh; anailís a dhéanamh ar bheartais agus sonraí; dualgais TF, riaracháin, taighde, chumarsáide agus chlársceidealaithe a dhéanamh, gan ach cuid acu a lua.
Clúdaíonn baill foirne shealadacha poist lena mbaineann cineálacha éagsúla cáilíochtaí agus speisialtóireachta, ó phoist cúntóirí go poist riarthóirí ar ghrád níos airde.
I gcás poist riarthóra, d’fhéadfaí baill foirne shealadacha a earcú ag grád tosaigh AD 5 go AD 6 nó ag gráid níos airde. Ar an dóigh chéanna, tosaíonn gráid na gcúntóirí ag AST 1 - AST 3, ach is féidir gráid níos airde a bheith ann i gcás próifílí níos speisialaithe.
Tá tuilleadh eolais le fáil sa tábla tuarastail seo (infheidhme ón 1 Eanáir 2024).
Féach na poist atá ar oscailt le haghaidh baill foirne shealadacha.
Tugann cláir oiliúna an Aontais deis do chéimithe nua cur lena scileanna gairmiúla, a líonra teagmhálaithe a mhéadú agus breis eolais a fháil ar an Aontas.
Tugann tréimhsí oiliúna (nó intéirneachtaí) léargas iontach ar obair státseirbhís an Aontais agus bíonn siad ar fáil i gcuid mhór réimsí éagsúla: an dlí, na hacmhainní daonna, an comhshaol, an chumarsáid, an t-airgeadas, an chosaint sonraí, an taighde eolaíoch, na beartais eachtracha, an mhaoin intleachtúil, gan ach beagán a lua.
Tréimhsí oiliúna a mhaireann cúig mhí de ghnáth, sin a eagraíonn Parlaimint na hEorpa, an Coimisiún Eorpach, an Chomhairle Eorpach, Cúirt Iniúchóirí na hEorpa agus gníomhaireachtaí an Aontais.
Is gá d’iarrthóirí céim ollscoile a bheith acu chun cur isteach ar thréimhse oiliúna. Nuair a bheidh na hoiliúnaithe earcaithe déanfaidh siad cúraimí atá cosúil leo sin a dhéanann riarthóirí ar ghrád níos ísle.
Is tréimhsí íoctha iad formhór na dtréimhsí oiliúna, agus is iondúil gur thart ar €1,300 sa mhí an méid a bhíonn i gceist.
Féach freisin roinnt de na tréimhsí oiliúna atá ar fáil agus clár na nAmbasadóirí EU Careers atá dírithe ar mhic léinn a mbeadh spéis acu gairmeacha an Aontais a chur chun cinn ar a gcampais ollscoile.
Earcaíonn institiúidí agus gníomhaireachtaí an Aontais iad nuair a bhíonn gá acu le baill foirne ag a bhfuil na sainscileanna is féidir le saineolaithe náisiúnta ar iasacht a chur ar fáil: saineolas teicniúil, slándála, dlíthiúil agus airgeadais, i measc go leor eile.
Is minic a fhógraítear poist mar shaineolaí náisiúnta ar iasacht ar leathanach na ndeiseanna fostaíochta atá ag EPSO. Na sonraí uile a bhaineann leis an bpróiseas roghnúcháin, le coinníollacha na hiasachta, le critéir incháilitheachta agus le cineál na gcúraimí, is féidir iad a fháil san fhógra folúntais lena mbaineann.
Is iad institiúidí, comhlachtaí agus gníomhaireachtaí an Aontais a bhíonn i gceannas ar a n-iarratas agus ar a bpróisis earcaíochta féin.
Téigh i dteagmháil le buanionadaíocht do thíre chuig an Aontas Eorpach chun eolas a fháil maidir leis na deiseanna atá ann faoi láthair.
Tá roinnt catagóirí foirne eile ann, cuir i gcás:
• Foireann eatramhach
• Saineolaithe an Aontais Eorpaigh
• Cúntóirí parlaiminteacha
• Saortheangeolaithe
• Foireann cothabhála agus ceaintín
Tá tuilleadh eolais faoi na catagóirí sin agus faoi na próisis is gá a leanúint chun cur isteach orthu le fáil ar an leathanach tiomnaithe.
