Maidir leis an bpróiseas roghnúcháin
Is í an Oifig Eorpach um Roghnú Foirne (EPSO) atá freagrach as baill foirne a roghnú le haghaidh poist bhuana agus poist ar conradh in institiúidí, comhlachtaí agus gníomhaireachtaí an Aontais Eorpaigh. Tá tuilleadh eolais faoi na próisis roghnúcháin éagsúla le fáil thíos.
Roghnú ball foirne buan
Is éard atá san fhoireann bhuan baill foirne de sheirbhís shibhialta an Aontais Eorpaigh a cheaptar ar feadh tréimhse éiginnte. Is iad an príomhlucht saothair iad agus roghnaítear iad trí chomórtais oscailte arna n-eagrú ag EPSO. Tá na comórtais sin ceaptha chun painéil a thiomsú, is é sin baiclí iarrthóirí ar éirigh leo ónar féidir le hinstitiúidí, comhlachtaí agus gníomhaireachtaí an Aontais Eorpaigh daoine a earcú nuair a bhíonn folúntais acu.
Baineann roinnt céimeanna le gach comórtas, ó fhoilsiú an chomórtais go tiomsú an phainéil.
Roghnú ball foirne ar conradh
Tá ról lárnach ag baill foirne ar conradh maidir le tacú le hobair institiúidí, chomhlachtaí agus ghníomhaireachtaí an Aontais Eorpaigh. Cuidíonn siad trí chúraimí riaracháin sealadacha a dhéanamh nó forlíonann siad réimsí speisialaithe ina bhfuil gá le scileanna breise. Is iondúil go n-earcaítear baill foirne ar conradh faoi chonarthaí ar théarma seasta suas le 6 bliana laistigh d’aon institiúid de chuid an Aontais Eorpaigh. I gcásanna áirithe, go háirithe sna gníomhaireachtaí, sna toscaireachtaí nó sna hionadaíochtaí, féadfar conarthaí tréimhse éiginnte a thairiscint.
Féach leat conas clárú i mbunachar sonraí ball foirne ar conradh.
Próisis roghnúcháin do chatagóirí eile ball foirne
Foilsíonn an Oifig Eorpach um Roghnú Foirne deiseanna fostaíochta do bhaill foirne sealadacha agus do shaineolaithe náisiúnta ar iasacht freisin thar ceann institiúidí, chomhlachtaí agus ghníomhaireachtaí an Aontais Eorpaigh.
Ní EPSO a bhainistíonn na próisis roghnúcháin sin go díreach. Tá gach institiúid, comhlacht nó gníomhaireacht freagrach as a bpróiseas earcaíochta féin, rud a d’fhéadfadh a bheith éagsúil ag brath ar an eagraíocht nó ar an bpost lena mbaineann.
Dá bhrí sin, moltar go láidir d’iarratasóirí na fógraí folúntais a léamh go cúramach chun eolas mionsonraithe a fháil maidir leis na critéir incháilitheachta, na riachtanais iarratais agus an próiseas roghnúcháin.
Féach na deiseanna go léir atá ann faoi láthair.
Féach freisin conas iarratas a dhéanamh i gcás catagóirí eile foirne, amhail: Foireann eatramhach, saineolaithe an Aontais Eorpaigh, cúntóirí Parlaiminteacha, saortheangeolaithe, foireann cothabhála agus ceaintín.