Chun iarratas a dhéanamh ar an gcomórtas Iniúchóireachta (AD 7), ní mór duit na riachtanais seo a leanas a chomhlíonadh:

• A bheith i do náisiúnach den Aontas Eorpach agus cearta iomlána mar shaoránach den Aontas a bheith agat.
   
• Eolas cuimsitheach a bheith agat ar cheann amháin de theangacha oifigiúla an Aontais (leibhéal C1) agus eolas sásúil a bheith agat ar cheann eile de theangacha oifigiúla an Aontais (leibhéal B2). 
   
• Ní mór cúrsa ollscoile a bheith críochnaithe agat
   
• Ní mór duit taithí oibre ábhartha idir 5 bliana agus 7 mbliana ar a laghad a bheith agat, arb i réimse na hiniúchóireachta a fuarthas 4 bliana ar a laghad den taithí sin, mar a leanas: 

  • Cúrsa ollscoile 3 bliana ar a laghad, ar baineadh dioplóma amach dá bharr, agus taithí oibre ábhartha 7 mbliana ar a laghad a fuarthas ina dhiaidh sin, arb i réimse na hiniúchóireachta a fuarthas 4 bliana ar a laghad den taithí sin;

    sin nó

  • Cúrsa ollscoile 4 bliana ar a laghad, ar baineadh dioplóma amach dá bharr, agus taithí oibre ábhartha 6 bliana ar a laghad a fuarthas ina dhiaidh sin, arb i réimse na hiniúchóireachta a fuarthas 4 bliana ar a laghad den taithí sin;

    sin nó

  • Cúrsa ollscoile 5 bliana ar a laghad, ar baineadh dioplóma amach dá bharr, agus taithí oibre ábhartha 5 bliana ar a laghad a fuarthas ina dhiaidh sin, arb i réimse na hiniúchóireachta a fuarthas 4 bliana ar a laghad den taithí sin.

Sa phróiseas roghnúcháin don chomórtas Iniúchóireachta (AD 7) tá trialacha réasúnaíochta ar líne, triail réimse-shonrach agus aiste shaorthéacs ar chúrsaí an Aontais Eorpaigh le déanamh. Féadfaidh sé go mbeidh na trialacha sin go léir le déanamh ar an lá céanna nó ar laethanta éagsúla. Cuirfear dátaí beachta gach trialach in iúl do gach iarratasóir tar éis an sprioc-ama le hiarratas a dhéanamh. 
Tá na sonraí ar fad le fáil san fhógra comórtais.

Féadfaidh na hiarrthóirí aon dá cheann de 24 theanga oifigiúla an Aontais a roghnú le haghaidh na dtrialacha.

Cuirfear ar phainéal na hiarrthóirí a n-éireoidh leo sa phróiseas roghnúcháin. 

Nuair a chuirfear na hiarrthóirí a n-éireoidh leo ar phainéal, féadfaidh seirbhísí earcaíochta chomhlachtaí agus institiúidí an Aontais ar spéis leo a bpróifíl dul i dteagmháil leo chun agallaimh earcaíochta spriocdhírithe a dhéanamh. Na hagallaimh sin agus aon phróiseas gaolmhar eile, tá siad lasmuigh den phróiseas roghnúcháin a dhéanann EPSO. Is iad na seirbhísí earcaíochta ábhartha a dhéanann na hagallaimh earcaíochta, i mBéarla agus/nó i bhFraincis de ghnáth. Féadfar teangacha eile a úsáid le linn na n-agallamh freisin, de réir riachtanais na seirbhísí earcaíochta agus an eolais a chuir na hiarrthóirí in iúl ina n-iarratas.

Don duine atá fostaithe acu, cuireann institiúidí agus comhlachtaí an Aontais Eorpaigh pobal saineolais ar fáil maille le cuid mhór deiseanna ar a fhorbairt phearsanta agus a fhorbairt ghairmiúil a leathnú. Na foirne ilchultúrtha idirnáisiúnta ilchineálacha a bhíonn ag obair i státseirbhís an Aontais Eorpaigh, bíonn siad ag obair ar son tuairim agus 450 milliún saoránach den Aontas agus tuilleadh nach iad.

Tá institiúidí agus comhlachtaí an Aontais a n-oibríonn EPSO dóibh tiomanta don éagsúlacht agus don chuimsiú. Féachann siad leis an éagsúlacht a bhaint amach go gníomhach agus cuireann siad an cuimsiú chun cinn i measc a mball foirne. Dá bhrí sin, is mór ag EPSO iarratais ó iarrthóirí cáilithe ó chúlraí éagsúla agus ón mbonn geografach is leithne is féidir i measc Bhallstáit an Aontais Eorpaigh. Tá tuilleadh eolais faoin Éagsúlacht agus Cuimsiú in institiúidí agus comhlachtaí an Aontais le fáil ar an leathanach gréasáin tiomnaithe seo.