1. Gearáin a dhéanamh

Aon iarrthóir a bhfuil deacrachtaí teicniúla aige a bhaineann lena scrúdú cianda, tá sé de cheart aige gearán a dhéanamh le EPSO. Ba cheart d’iarrthóirí féachaint ar an bhfógra comórtais chun forléargas iomlán a fháil ar na bealaí éagsúla inar féidir leo gearán a dhéanamh.
Tá an tréimhse ama chun gearán a dhéanamh sonraithe san fhógra comórtais lena mbaineann, sa ghlao ar léiriú spéise agus sna rialacha ginearálta maidir le comórtais oscailte.
Is ceart gearáin a dhéanamh tríd an gcainéal ainmnithe: Foirm Theagmhála d’Iarrthóirí.
Cuireann EPSO na sonraí agus na treoracha uile is gá ar fáil d’iarrthóirí maidir le rialacha mionsonraithe na dtrialacha, ar a dhéanaí faoin uair a thabharfar cuireadh dóibh na trialacha a dhéanamh.
Ní mór d’iarrthóirí gach céim riachtanach a dhéanamh a bhfuil tagairt di sna treoracha a eisítear roimh na trialacha, cuir i gcás bogearraí a shuiteáil, an sioncrónú/na sioncrónuithe riachtanacha a dhéanamh, triail nascachta a dhéanamh, tástáil réamhriachtanais theicniúil a dhéanamh, seiceáil comhoiriúnachta córais a dhéanamh agus/nó tástáil chun eolas a chur ar an ardán trialach lena mbaineann. Ach na céimeanna sin a chur i gcrích beidh na hiarrthóirí in ann a dhearbhú go bhfuil a dtimpeallacht TF réidh agus go bhfuil a ngléasanna comhoiriúnach d’ardán na trialach agus d’fheidhmchlár na trialach. Is é an cuspóir atá ann an t-eispéireas is fearr is féidir a chinntiú don iarrthóir sa triail. Mura gcuirtear na céimeanna éigeantacha i gcrích, d’fhéadfaí cosc a chur ar iarrthóirí na trialacha a dhéanamh agus cuirfear teorainn le cumas an tsoláthraí trialach cúnamh éifeachtach a thabhairt d’iarrthóirí maidir le haon fhadhb theicniúil le linn na dtrialacha.
I gcásanna nach ndéanfaidh iarrthóirí triail amháin nó níos mó nó nach gcuirfidh siad i gcrích iad, féadfar deireadh a chur lena rannpháirtíocht sa roghnú nó sa chomórtas, ach amháin más féidir leis na hiarrthóirí a chruthú gur de thoradh imthosca gan choinne nach raibh neart acu orthu nach ndearna siad an triail nó nár chuir siad i gcrích í. D’fhéadfaí a áireamh leis sin fadhbanna teicniúla a dhoiciméadaítear i gceart nó cásanna force majeure (féach pointe 5 – Beartas maidir le force majeure). I gcás fadhbanna teicniúla le linn na trialach, ba cheart d’iarrthóirí teagmháil a dhéanamh le EPSO a luaithe is féidir laistigh den amchlár atá leagtha síos le haghaidh gearán. I gcás force majeure, ba cheart d’iarrthóirí teagmháil a dhéanamh le EPSO roimh an triail más féidir nó ar lá na trialach ar a dhéanaí. Ní mór d’iarrthóirí na doiciméid uile is gá a bhaineann leis an imeacht a chur ar fáil.
Mura gcloífear leis na treoracha agus leis an eolas a chuirtear ar fáil d’iarrthóirí i ndáil leis an triail, ní mheasfar gur imthosca gan choinne ná cás force majeure atá ann.