Id-dokumenti ta’ sostenn jistgħu jkunu fi kwalunkwe waħda mill-24 lingwa uffiċjali tal-UE.

Trid tkun iġġustifikata l-informazzjoni pprovduta fil-formola tal-applikazzjoni tiegħek. Jekk tonqos milli tipprovdi biżżejjed evidenza dokumentarja sal-iskadenza meħtieġa fl-Avviż tal-Kompetizzjoni, tista’ titqies bħala mhux eliġibbli u eskluż mill-kompetizzjoni.

1) Jekk jogħġbok applowdja u illinkja kull dokument mal-entrata li jirreferi għaliha fl-applikazzjoni online tiegħek. Il-Bord ta’ Selezzjoni se jikkonsulta biss id-dokumenti li tillinkja mal-applikazzjoni speċifika tiegħek għal kompetizzjoni partikolari.

2) Iċċekkja jekk ipprovdejtx l-evidenza dokumentarja kollha meħtieġa għall-applikazzjoni tiegħek. Kull entrata tal-formola tal-applikazzjoni online tiegħek (edukazzjoni, esperjenza professjonali) trid tkun appoġġjata mid-dokumenti rilevanti, inkella ma tiġix ikkunsidrata.

Id-dokumenti ta’ sostenn li għandhom jiġu pprovduti huma prinċipalment:

1. Identità: kopja tal-karta tal-identità jew tal-passaport validu tiegħek

2. Edukazzjoni

- Applowdja d-diplomi sekondarji tiegħek (għall-kompetizzjonijiet AST-SC / AST biss) u postsekondarji (għall-kompetizzjonijiet AST u AD) flimkien mal-lista tal-korsijiet li segwejt.

- Kun ċert li tinkludi d-diploma li tagħtik aċċess għall-kompetizzjoni kif meħtieġ fl-Avviż tal-Kompetizzjoni, il-punt 3.3. “Kundizzjonijiet speċifiċi — kwalifiki u
esperjenza ta’ xogħol” u li ismek, it-timbri, il-firem u n-numri tas-serje tiegħek (jekk applikabbli) huma viżibbli.   

- Żid prova ta’ kwalunkwe traineeship u taħriġ rilevanti, dment li jagħtu aċċess għall-kompetizzjoni (jekk jogħġbok irreferi għall-Avviż tal-kompetizzjoni)

Lawrji, diplomi u/jew ċertifikati, kemm jekk maħruġin fi Stati Membri kif ukoll jekk f’pajjiżi mhux tal-UE, iridu jiġu rikonoxxuti minn awtorità kompetenti ta’ Stat Membru, ara wkoll il-Mistoqsijiet Frekwenti tagħna: Taċċettaw il-kwalifika/id-diploma tiegħi maħruġa f’pajjiżi mhux tal-UE?

3. Esperjenza professjonali

Kun ċert li tipprovdi dokumenti li juru n-natura tad-dmirijiet tiegħek u t-tul ta’ żmien tal-esperjenza tiegħek kif indikat hawn taħt: Perjodi ta’ esperjenza professjonali li mhumiex ikkorroborati minn deskrizzjoni tal-impjieg ma jitqisux mill-Bord ta’ Selezzjoni.

Jekk jogħġbok ara hawn taħt xi eżempji tat-tip ta’ dokumenti li l-kandidati għandhom jipprovdu.

3.1. Għal xogħol b’salarju:

Dokumenti mill-impjegatur(i) attwali u preċedenti li jiddikjaraw in-natura u l-livell tad-dmirijiet imwettqin bħal ittri mis-superjur ġerarkiku, rapporti ta’ evalwazzjoni li jiddeskrivu l-kompiti tiegħek, deskrizzjonijiet tax-xogħol ipprovduti mill-impjegatur tiegħek, kuntratti inklużi deskrizzjonijiet dettaljati tad-dmirijiet imwettqin.

- Kuntratt(i) ta’ impjieg bid-data tal-bidu u tat-tmiem, jew l-ewwel u l-aħħar dikjarazzjonijiet tal-paga.

Jekk jogħġbok innota li d-dokumenti kollha jridu jkunu datati, ikollhom ismek, ikollhom l-intestatura uffiċjali tal-kumpanija, it-timbru, kif ukoll l-isem u l-firma tal-persuna responsabbli.

3.2. Għal dawk li jaħdmu għal rashom - professjonijiet liberi:

- Fatturi, Kuntratti, Formoli tal-ordnijiet
- Korrispondenza bil-email
- Minuti tal-laqgħat
- Kontijiet tat-taxxa
- Sħubija ta’ assoċjazzjoni professjonali

Kun ċert li tipprovdi d-dokumenti kollha li għandek għad-dispożizzjoni tiegħek u li int intitolat li tixxerja. Id-dokumenti tiegħek se jiġu ttrattati f’konformità mal-istqarrija ta’ privatezza tagħna.

Għal aktar informazzjoni, jekk jogħġbok iċċekkja l-avviż tal-kompetizzjoni, b’mod partikolari t-taqsima “Dokumenti ta’ sostenn” u t-taqsimiet tal-FAQ Eliġibbiltà.

Hi r-responsabbiltà tal-kandidati li jipprovdu lill-Bord ta’ Selezzjoni bl-informazzjoni u d-dokumenti kollha meħtieġa biex jivverifikaw li jissodisfaw il-kundizzjonijiet stabbiliti fl-avviż tal-kompetizzjoni.

Il-kandidati jistgħu jiġu kkuntattjati permezz ta’ email biex jipprovdu informazzjoni jew dokumenti addizzjonali dwar diploma jew esperjenza professjonali partikolari, f’każ li jkunu meħtieġa.