Beidh bord roghnúcháin ar leith ag gach próiseas roghnúcháin chun na hiarrthóirí is fearr a roghnú ar bhonn na gcáilíochtaí agus na n-inniúlachtaí atá sainithe san fhógra comórtais. Oifigigh ó institiúidí an Aontais Eorpaigh atá sna bord roghnúcháin, agus déanann EPSO gach iarracht cothromaíocht a chinntiú i dtaca le hinscne, inniúlacht teanga, coibhneas idir baill foirne agus lucht riaracháin, agus méid na hinstitiúide. Tá cathaoirleach i gceannas ar obair an bhoird agus cabhraíonn leas-chathaoirleach amháin nó roinnt leas-chathaoirleach leis. Cumhdaíonn rúndacht imeachtaí an bhoird gach cúram a bhaineann le measúnú na n-iarrthóirí le linn an phróisis roghnúcháin.

Cuireann EPSO béim mhór ar an gcomhionannas agus déanann sé gach iarracht meas a léiriú ar chomhdheiseanna do na hiarrthóirí uile, agus a chinntiú go gcaitear ar an dóigh chéanna leo agus go bhfuil an rochtain chéanna acu ar a chuid seirbhísí, mar a leanas:

• Is é prionsabal na neamhchlaontachta an prionsabal uileghabhálach a threoraíonn obair an bhoird roghnúcháin. Mar shampla, ní féidir aon nasc ordlathach díreach ná gaol teaghlaigh díreach a bheith ann idir comhalta den bhord roghnúcháin agus an t-iarrthóir a bhfuil sé ag déanamh measúnú air. Mar sin féin, ní hionann caidreamh gairmiúil roimhe a bheith ann, nó fiú caidreamh gairmiúil de chineál níos faide amach a bheith ann san am i láthair, agus a rá go huathoibríoch nach féidir an measúnú a dhéanamh.
• Ní mór do chomhaltaí an bhoird roghnúcháin agus d’iarrthóirí araon aon choinbhleacht leasa a d’fhéadfadh a bheith ann a chur in iúl do EPSO ionas gur féidir an méid sin a chur san áireamh agus coigeartuithe a dhéanamh dá réir.
• Leanann an bord roghnúcháin an cháilitheacht réamhbhunaithe, agus na critéir roghnúcháin agus mheasúnaithe atá leagtha amach san fhógra comórtais. Déantar na critéir sin a dhoiciméadú, a ghlacadh agus a chur i bhfeidhm go cúramach agus go leanúnach.
• Le hoiliúint leitheadach, cóitseáil agus maoirseacht na gcomhaltaí boird, chomh maith le cruinnithe rialta athbhreithnithe, cinntítear cur chuige comhchuibhithe ó thaobh measúnuithe de.

Bíonn EPSO ag déanamh rialuithe cáilíochta agus anailísí staitistiúla córasacha chun monatóireacht a dhéanamh ar aon chlaontacht a d’fhéadfadh a bheith ann, agus deireadh a chur léi, agus measúnú á dhéanamh ar na hiarrthóirí.