L-istituzzjonijiet, il-korpi u l-aġenziji tal-UE joffru kategoriji ta’ persunal u tipi ta’ kuntratti differenti, skont in-natura u d-durata tad-dmirijiet imwettqa.

Il-kategoriji ewlenin jinkludu:

• Uffiċjali permanenti (AD, AST, AST/SC) 
• Aġenti kuntrattwali 
• Aġenti temporanji 
• Esperti Nazzjonali Sekondati (SNEs) 
• Staff interim 
• Trainees  

L-EPSO jorganizza biss il-proċeduri ta’ selezzjoni għall-persunal permanenti u kuntrattwali.

Il-proċeduri tal-għażla għall-kategoriji l-oħra tal-persunal huma ġeneralment immaniġġjati direttament mill-istituzzjonijiet, il-korpi u l-aġenziji tal-UE nfushom.

 Skopri aktar dwar:

• il-kategoriji tal-persunal reklutati permezz tal-EPSO 
• il-kategoriji tal-persunal reklutati direttament mill-istituzzjonijiet, il-korpi u l-aġenziji tal-UE
• it-trainees

Id-differenzi ewlenin bejn l-uffiċjali permanenti, l-aġenti temporanji u l-aġenti kuntrattwali jikkonċernaw:

• it-tip u d-durata tal-kuntratt, 
• il-proċedura tal-għażla, 
• u n-natura tad-dmirijiet imwettqa. 

Uffiċjali permanenti

Il-membri tal-istaff permanenti huma membri tas-servizz ċivili tal-UE maħturin għal żmien indefinit. Dawn jikkostitwixxu l-forza tax-xogħol ewlenija u huma reklutati permezz ta’ kompetizzjonijiet miftuħa organizzati mill-EPSO. Hemm tliet kategoriji għall-uffiċjali permanenti tal-UE: Amministraturi (AD), Assistenti (AST) u Segretarji/Skrivani (AST/SC).

Aġenti temporanji

L-aġenti temporanji jiġu reklutati għal pożizzjonijiet b’terminu fiss jew temporanji, spiss biex iwettqu kompiti speċjalizzati jew funzjonijiet maniġerjali. Il-proċeduri tal-għażla normalment jiġu organizzati direttament mill-istituzzjoni, mill-korp jew mill-aġenzija tal-UE li tkun qed tirrekluta.

Aġenti kuntrattwali

L-aġenti kuntrattwali jiġu reklutati b’kuntratti b’terminu fiss biex iwettqu kompiti amministrattivi, tekniċi, operazzjonali jew ta’ appoġġ, jew biex jipprovdu kapaċità addizzjonali f’oqsma speċjalizzati. Dawn jiġu reklutati f’erba’ gruppi ta’ funzjoni (FG I-IV), skont ir-responsabbiltajiet u l-kwalifiki meħtieġa. Il-proċeduri tal-għażla għall-persunal kuntrattwali huma organizzati mill-EPSO.

Ir-rekwiżiti tal-eliġibbiltà, il-kundizzjonijiet kuntrattwali u l-opportunitajiet ta’ karriera jvarjaw skont il-kategorija tal-persunal u l-pożizzjoni kkonċernata.

L-istaff kuntrattwali jiġi reklutat fi gruppi ta’ funzjoni differenti (FG I-IV), li jiddeterminaw it-tip ta’ xogħol, il-livell ta’ responsabbiltà, u l-kwalifiki minimi meħtieġa.

• Grupp ta' Funzjoni I (FG I): impenji manwali u tal-appoġġ amministrattiv 
• Grupp ta' Funzjoni II (FG II): ħidma klerikali u segretarjali, tmexxija tal-uffiċċju u xogħol ta’ dan it-tip
• Grupp ta' Funzjoni III (FG III): xogħol eżekuttiv, abbozzar, kontabilità u dan it-tip ta’ xogħol tekniku
• Grupp ta' Funzjoni IV (FG IV): xogħol amministrattiv, konsultattiv, lingwistiku u ta’ dan ix-xorta.

Il-grupp ta’ funzjoni li tista’ tkun eliġibbli għalih jiddependi mill-edukazzjoni u l-esperjenza professjonali tiegħek, kif speċifikat fis-Sejħa għal Espressjonijiet ta’ Interess.

Id-dmirijiet speċifiċi jiddependu fuq il-profil li jinteressak. Ara l-Anness I tas-Sejħa għal Espressjonijiet ta’ Interess għal eżempji dettaljati ta’ dmirijiet għal kull profil.

L-aġenti kuntrattwali huma impjegati għal perjodu limitat, b’kuntratt inizjali ta’ minn 6 sa 12-il xahar.

F’xi korpi tal-UE, jista’ jkun possibbli li l-kuntratt jiġġedded għal perjodu ta’ żmien indefinit.

Il-kundizzjonijiet tax-xogħol għall-istaff tal-UE huma stabbiliti fir-Regolamenti tal-Persunal tal-UE.

Il-kundizzjonijiet tax-xogħol jistgħu jvarjaw skont l-istituzzjoni jew il-korp tal-UE. Għal regoli speċifiċi jew informazzjoni addizzjonali, il-kandidati jingħataw il-parir li jikkonsultaw is-servizzi rilevanti tar-Riżorsi Umani.

Ara l-livelli tas-salarji u l-progressjoni (aġġornati fil-11.4.2025) għal aktar informazzjoni dwar is-salarji.

L-Assistenti (AST) ġeneralment jaħdmu fi rwoli ta’ appoġġ amministrattiv, tekniku jew eżekuttiv fl-istituzzjonijiet tal-UE. Il-ħidma tagħhom tista’ tinkludi oqsma bħall-ġestjoni finanzjarja u baġitarja, ir-riżorsi umani, il-komunikazzjoni, l-appoġġ għall-politika, l-IT, il-ġestjoni tad-dokumenti, ir-riċerka, jew ix-xogħol xjentifiku u tal-laboratorju. Huma għandhom rwol importanti fil-funzjonament intern tal-istituzzjonijiet.

L-assistenti jkopru gradi minn AST 1 sa AST 11, li jirriflettu livelli differenti ta’ responsabbiltà u esperjenza:

• AST 1: livell ta’ dħul, li jirrikjedi tal-anqas edukazzjoni sekondarja u esperjenza professjonali rilevanti jew kwalifika vokazzjonali rilevanti 
• AST 3: tipikament jeħtieġ edukazzjoni sekondarja, kwalifika vokazzjonali rilevanti, u/jew diversi snin ta’ esperjenza professjonali rilevanti 
• Gradi AST ogħla jinvolvu progressivament aktar responsabbiltà u rekwiżiti ta’ esperjenza

L-Assistenti Segretarji (AST/SC), imsejħa wkoll Segretarji/Skrivani, ġeneralment jaħdmu fi rwoli ta’ ġestjoni tal-uffiċċju u ta’ appoġġ amministrattiv fi ħdan l-istituzzjonijiet tal-UE. Il-kompiti tagħhom jistgħu jinkludu t-tħejjija ta’ fajls, l-appoġġ għall-koordinazzjoni u l-organizzazzjoni ta’ attivitajiet dipartimentali, it-trattament ta’ dokumenti, u l-għoti ta’ appoġġ amministrattiv ġenerali lit-timijiet, lill-maniġers u lis-servizzi.

L-Assistenti Segretarji jkopru gradi minn AST/SC 1 sa AST/SC 6, li jirriflettu livelli differenti ta’ responsabbiltà u esperjenza:

• Staff ġdid normalment jidħol fil-gradi AST/SC 1 jew AST/SC 2
• AST/SC 1: livell ta’ dħul, li jirrikjedi edukazzjoni sekondarja u jew esperjenza professjonali rilevanti jew kwalifika vokazzjonali rilevanti 
• AST/SC 2: xi drabi jintuża għal kandidati b’aktar esperjenza 
• Gradi AST/SC ogħla jinvolvu livelli dejjem jiżdiedu ta’ responsabbiltà u esperjenza

Ir-rwol ġenerali tal-amministraturi (AD) hu li jappoġġaw lil dawk li jieħdu d-deċiżjonijiet biex iwettqu l-missjoni tal-istituzzjoni jew tal-korp tagħhom. Dawn tipikament jaħdmu f’oqsma bħall-formulazzjoni tal-politika, l-implimentazzjoni operazzjonali, il-koordinazzjoni u l-ġestjoni tar-riżorsi u l-programmi.

Il-kompiti tagħhom jistgħu jvarjaw skont l-istituzzjoni u l-pożizzjoni speċifika u huma dejjem deskritti fid-dettall fl-Avviż tal-Kompetizzjoni jew fl-avviż ta’ pożizzjoni vakanti.

L-amministraturi jkopru gradi minn AD 5 sa AD 16, li jirriflettu livelli differenti ta’ responsabbiltà u anzjanità fil-kariga:

• AD 5: livell ta’ dħul għal gradwati universitarji, ġeneralment mingħajr il-ħtieġa ta’ esperjenza professjonali 
• AD 6–AD 7: rwoli speċjalizzati li jeħtieġu diversi snin ta’ esperjenza professjonali rilevanti 
• AD 9–AD 12: pożizzjonijiet ta’ maniġment intermedju li jeħtieġu esperjenza maniġerjali ppruvata 
• AD 13–AD 16: rwoli ta’ maniġment superjuri b’responsabbiltajiet strateġiċi u ta’ tmexxija ta’ livell għoli