Se ssib aktar informazzjoni fir-regolamenti tal-persunal.
FAQs
Below you can find the answer to your question. If you are searching in your language and you are not getting any results, please try in English. The content may not yet be translated.
Fejn nista' nikseb aktar informazzjoni dwar il-kundizzjonijiet tax-xogħol?
Kandidati li għaddew / reklutaġġ
Kif jirreklutaw l-istituzzjonijiet mil-listi tal-EPSO?
Kandidati li għaddew / reklutaġġ
Kif ikun hemm opportunitajiet ta’ xogħol, l-istituzzjonijiet jivverifikaw il-profili tal-kandidati li għaddew u jinsabu fil-“lista ta’ riżerva” biex jidentifikaw lil dawk li jaqblu l-aktar mal-ħtiġijiet tagħhom (pereżempju, f’termini ta’ edukazzjoni, esperjenza professjonali u ħiliet lingwistiċi).
L-istituzzjonijiet jistgħu wkoll jagħżlu li jippubblikaw il-pożizzjonijiet vakanti disponibbli għal kandidati li għaddew minn proċeduri ta’ selezzjoni rilevanti permezz tal-profil tal-EPSO tagħhom.
Il-pubblikazzjoni ta’ pożizzjonijiet vakanti fil-profil tal-EPSO tiegħek hija r-responsabbiltà tal-istituzzjonijiet tal-UE. Huma jiddeċiedu liema pożizzjonijiet vakanti jiftħu għal liema lista/i ta’ riżerva.
Skont ir-Regolamenti tal-Persunal, l-uffiċjali li diġà jaħdmu fi ħdan l-istituzzjonijiet għandhom jitqiesu qabel il-kandidati fuq lista ta’ riżerva.
L-għadd ta’ persunal impjegat mill-istituzzjonijiet tal-UE huwa proporzjonali għad-daqs u l-funzjonijiet tagħhom.
Għal aktar informazzjoni, ara wkoll: Kif napplika għal impjieg ladarba nkun fil-lista ta’ riżerva?
Kemm iddum valida l-lista ta’ riżerva tiegħi?
Kandidati li għaddew / reklutaġġ
Il-listi ta’ riżerva ġeneralment huma validi għal sena waħda (jew tliet snin għall-ispeċjalisti). Il-validità tista' tittawwal (mill-EPSO) skont il-ħtiġijiet tal-istituzzjonijiet. Normalment tittieħed deċiżjoni ftit qabel ma tiskadi l-lista u din tiġi ppubblikata fis-sit web Karrieri mal-UE.
Il-validità inizjali ta’ lista tibda mill-mument li l-kandidati li jgħaddu jkunu notifikati li tqiegħdu fil-lista ta’ riżerva. Il-validità inizjali hija ppubblikata fil-paġna tal-Listi ta’ riżerva.
Kwalunkwe dewmien fil-pubblikazzjoni tal-lista fil-paġna tal-Listi ta’ riżerva m’għandu l-ebda impatt fuq il-proċess ta’ reklutaġġ innifsu.
Nista’ naħdem xi mkien ieħor minbarra Brussell jew il-Lussemburgu?
Kandidati li għaddew / reklutaġġ
80% tal-impjiegi huma offruti fi Brussell u l-Lussemburgu.
Il-Kummissjoni Ewropea għandha rappreżentanzi f'kull pajjiż tal-UE. Il-Parlament Ewropew ukoll għandu uffiċċju ta' informazzjoni f'kull pajjiż tal-UE u s-Servizz Ewropew għall-Azzjoni Esterna għandu delegazzjonijiet f'postijiet madwar id-dinja.
L-UE għandha wkoll ħafna aġenziji u entitajiet deċentralizzati bbażati f'pajjiżi differenti. Sib liema minn dawn huma bbażati f’pajjiżek.
Hemm appoġġ għar-rilokazzjoni?
Kandidati li għaddew / reklutaġġ
Hekk kif tirċievi u taċċetta offerta ta' impjieg, is-servizzi tal-HR tal-istituzzjonijiet fi Brussell u l-Lussemburgu se jgħinuk tissetilja. B'mod partikolari, se jgħinuk issib fejn toqgħod (inkluża l-verifika tal-kuntratt tal-kera tiegħek). Jiġu organizzati wkoll Ġranet ta' Informazzjoni biex jgħinu lill-partners ta’ staff ġdid jissetiljaw f'ħajja ġdida f'pajjiż ġdid.
Kemm Brussell kif ukoll il-Lussemburgu joffru skejjel nazzjonali, Ewropej u internazzjonali eċċellenti. Is-servizzi msemmija hawn fuq jistgħu jgħinuk tagħmel kuntatt mal-crèches, il-playgroups u faċilitajiet oħra.
Ma nistax nilloggja fil-Profil tal-EPSO tiegħi jew nikkonsultah, x’għandi nagħmel?
Il-kont tiegħi
Ara li qed tuża l-login u l-password korretti (ara “Insejt il-username/login? / Insejt il-password?”).
Ftakar: ma għandekx permess toħloq aktar minn Profil tal-EPSO wieħed, iżda f’każ li l-Profil tal-EPSO tiegħek tħassar, tista’ toħloq wieħed ġdid għall-applikazzjonijiet futuri tiegħek. Il-Profil tal-EPSO tiegħek għandu mnejn tħassar skont l-istqarrija ta’ privatezza dwar il-protezzjoni tad-data personali. Fil-qosor, b’mod regolari nħassru l-kontijiet li ġejjin:
Il-Profili tal-EPSO bla applikazzjonijiet u li nħolqu aktar minn sena ilu
Il-Profili tal-EPSO tal-anqas b’applikazzjoni waħda, u fejn l-applikazzjonijiet kollha tiegħek jissodisfaw wieħed mill-kriterji li ġejjin:
Int tpoġġejt fuq Lista ta’ Riżerva ta’ kandidati li għaddew u kont reklutat aktar minn sena ilu;
Int tpoġġejt fuq Lista ta’ Riżerva ta’ kandidati li għaddew u ma kontx reklutat, iżda l-Lista ta’ Riżerva issa hi magħluqa;
Ma tpoġġejtx fuq Lista ta’ Riżerva ta’ kandidati li għaddew u l-proċedura ta’ selezzjoni ngħalqet aktar minn sena ilu.
Jista’ jkollok profil wieħed biss tal-EPSO u tista’ tiġi eskluż f’kull stadju tal-proċedura tal-għażla minħabba li jkollok aktar minn profil wieħed.
Tista’ tiċċekkja jekk diġà għandekx Profil tal-EPSO hawnhekk: Insejt il-username/login? Daħħal wieħed wieħed l-indirizzi tal-email kollha li stajt użajt biex toħloq Profil tal-EPSO u ċċekkja jekk tirċevix messaġġ f’dak l-indirizz tal-email.
Imbagħad tista’ wkoll tirkupra l-password biex terġa’ taċċessa l-profil tal-EPSO tiegħek: Insejt il-password?
Jekk xorta waħda ma tistax tilloggja, jekk ma tistax tiftakar l-email fil-Profil tal-EPSO tiegħek jew m’għadx għandekx aċċess għalih, jekk jogħġbok ikkuntattjana immedjatament. Jekk tibgħatilna kopja tal-ID jew tal-passaport tiegħek u tipprovdilna l-indirizz tal-email il-ġdid tiegħek, nistgħu nbiddlu l-email fil-Profil tal-EPSO tiegħek.
Jekk ikollok bżonn tbiddel l-indirizz tal-email tiegħek u għad għandek aċċess għal dak illinkjat mal-Profil tal-EPSO tiegħek:
Tista’ tbiddel l-indirizz tal-email ta’ komunikazzjoni tiegħek fil-profil tal-EPSO tiegħek stess, billi tikklikkja fuq “Data personali” u mbagħad fuq “Editja d-data personali tiegħi”. Tinsiex tissejvja wara li tkun daħħalt il-bidla.
Ladarba tillinkja l-indirizz tal-email il-ġdid tiegħek mal-profil tal-EPSO tiegħek, jekk jogħġbok ikkuntattjana b’mod urġenti permezz tal-formola ta’ kuntatt biex tikkonferma li lestejt il-bidla, sabiex inkunu nistgħu ninfurmaw lill-kuntrattur tagħna dwar il-bidla fl-indirizz tal-email tiegħek.
Jekk ikollok bżonn tbiddel l-indirizz tal-email tiegħek u m’għadx għandek aċċess għal dak illinkjat mal-profil tal-EPSO tiegħek:
Jekk jogħġbok ibgħatilna messaġġ ġdid permezz tal-formola ta’ kuntatt flimkien mal-kopja tal-karta tal-identità jew tal-passaport tiegħek li turi d-data tat-twelid tiegħek. Imbagħad inkunu nistgħu nidentifikawk fis-sistema u nbiddlu l-indirizz tal-email għalik.
Meta hija l-iskadenza għar-reġistrazzjoni?
L-applikazzjoni tiegħi
L-iskadenza għar-reġistrazzjoni se tkun iddikjarata b’mod ċar fuq kull Avviż/Sejħa u fis-sit web tal-EPSO.
Nista’ napplika għal diversi proċessi ta' selezzjoni, profili u/jew gruppi ta’ funzjoni?
L-applikazzjoni tiegħi
Iva, tista’ tapplika għal kwalunkwe proċess ta' selezzjoni li int eliġibbli għalih, sakemm ma jkunx iddikjarat mod ieħor fl-Avviż/fis-Sejħa. Jekk jogħġbok innota li tista’ tissottometti applikazzjoni waħda għal kull profil u/jew grupp ta’ funzjoni.
Nista’ nuża l-applikazzjoni tiegħi mill-applikazzjonijiet tal-EPSO preċedenti tiegħi?
L-applikazzjoni tiegħi
Għall-kompetizzjonijiet miftuħa kollha ppubblikati wara l-1 ta’ Jannar 2025:
Trid timla d-dettalji tas-CV tiegħek darba biss (taħt “Il-kont tiegħi” → “Is-CV tiegħi” fil-Portal Uniku tal-Kandidati).
L-informazzjoni ssejvjata fis-CV tiegħek se tintuża għall-applikazzjonijiet futuri kollha, għalhekk jekk jogħġbok kun ċert li żżommha aġġornata.
Għall-proċeduri ta’ selezzjoni tal-aġenti kuntrattwali:
Le, trid timla formola ta’ applikazzjoni ġdida fil-profil tal-EPSO tiegħek għal kull proċedura ta’ selezzjoni li tixtieq tapplika għaliha.
F’liema każ nista’ nibgħat talba għal reviżjoni?
Ilmenti
Tista’ titlob rieżami ta’ kwalunkwe deċiżjoni tal-Bord ta' Selezzjoni jew tal-EPSO li taffettwa l-progress tiegħek fi kwalunkwe stadju tal-proċedura ta’ selezzjoni, jekk inti tqis li jkun sar żball materjali jew ksur tar-regoli tal-kompetizzjoni.