Tá EPSO tiomanta a chinntiú go mbeidh comhionannas deiseanna ag na hiarrthóirí uile agus rochtain acu ar a phróisis roghnúcháin. Chuige sin, déanann sé monatóireacht leanúnach ar a phróisis tástála agus roghnúcháin chun a chinntiú go gcloítear leis an bprionsabal sin. Tugann EPSO an deis do na hiarrthóirí uile aon riachtanais shonracha atá acu mar gheall ar mhíchumas nó riocht sláinte a chur in iúl, a mbeadh freastal réasúnta (i.e. socruithe réasúnta) ag teastáil ina leith ag céim ar bith de na trialacha. Cuirtear an t-eolas sin in iúl go soiléir ón tús ar shuíomh gréasáin EPSO, san fhoirm iarratais agus i ngach fógra comórtais ar leith (i gcás comórtais oscailte) nó i ngach glao ar léiriú spéise (i gcás roghnúcháin CAST).

Tá ábhair fógraíochta forbartha ag EPSO chun an próiseas maidir le freastal réasúnta a mhíniú agus chun iarrthóirí a chur ar an eolas faoin gcaoi ar féidir leo socruithe a iarraidh le haghaidh na dtrialacha roghnúcháin. Tá tuilleadh eolais faoi chur chuige EPSO i leith an chomhionannais agus na héagsúlachta le fáil ar leathanach gréasáin EPSO maidir le comhionannas deiseanna. Chun féachaint ar an bhfíseán faoi conas socruithe speisialta a iarraidh le haghaidh na dtrialacha roghnúcháin, téigh chuig leathanach gréasáin EPSO maidir leis an gcomhionannas. 
Ina theannta sin, tá fógrán céim ar chéim maidir leis an nós imeachta freastail réasúnta ar fáil freisin (is féidir leagan Braille a chur ar fáil ach sin a iarraidh).

San fhorléargas sin déantar cur síos ar roinnt socruithe is féidir le hiarrthóirí a iarraidh le haghaidh na dtrialacha roghnúcháin. Déanfar é a nuashonrú de réir mar is ábhartha.

I gcás gach cineáil freastail, gheobhaidh tú an méid seo thíos:

• Cur síos ar an bhfreastal (‘cén rud?’).
• An chéim den phróiseas roghnúcháin inar féidir an freastal sin a dheonú (‘cén uair?’).
• An t-ardán tástála ar líne nó áiteanna inar féidir an freastal sin a dheonú, san Aontas Eorpach nó ar fud an domhain (‘cén áit?’).
• An té atá freagrach as an bhfreastal a chur ar fáil (‘cé?’).

Tá an liosta sin táscach agus neamh-uileghabhálach. Is é is aidhm dó léiriú a thabhairt ar fhreastal agus feidhmiúlachtaí trealaimh TF a d’fhéadfadh a bheith ann, agus níl sé conarthach. Déanfaidh EPSO a dhícheall an freastal réasúnta is gá a chur ar fáil do na hiarrthóirí.