Cuirfear Tairseach Aonair na nIarrthóirí in ionad na gCuntas EPSO atá ann faoi láthair le haghaidh iarratais ar chomórtais oscailte. Trí Thairseach Aonair na nIarrthóirí a thabhairt isteach, is mian le EPSO eispéireas níos rianúla a chur ar fáil d’iarrthóirí agus iad ag déanamh iarratais. Is tapúla agus is éifeachtúla a bheidh an próiseas iarratais dá bharr, rud a chuirfidh ar chumas iarrthóirí athúsáid a bhaint as eolas a tugadh in iarratais roimhe seo, cuir i gcás. 

Níl an córas nua iarratais infheidhme go fóill maidir le gach próiseas roghnúcháin EPSO. Mar shampla, i gcás phróisis roghnúcháin CAST le haghaidh baill foirne ar conradh, ní mór d’iarrthóirí a n-iarratas a chur isteach trína gcuntas EPSO go fóill, go bhfógrófar a mhalairt. Thairis sin, i gcás comórtais oscailte agus próisis roghnúcháin eile a d’fhoilsigh EPSO go dtí an 31 Nollaig 2024, leanfaidh EPSO den chomhfhreagras ábhartha a fhoilsiú i gcuntais EPSO na n-iarrthóirí. 

Ciallaíonn sé sin go mbeidh dhá chuntas ag roinnt iarrthóirí (Cuntas EPSO amháin agus próifíl amháin ar Thairseach Aonair na nIarrthóirí) dá n-iarratais.  

Úsáideann EPSO na cuntais iarrthóirí (Cuntas EPSO/Tairseach Aonair na nIarrthóirí) freisin chun teachtaireachtaí a sheoladh chuig na hiarrthóirí. Dá bhrí sin, ba cheart duit féachaint ar do chuntas iarrthóra gach trí lá féilire. 

Sula ndéana tú iarratas, iarrfar ort cuntas iarrthóra a chruthú mura bhfuil ceann agat cheana. 

Ní féidir ach cuntas EPSO amháin a bheith agat le haghaidh do chuid iarratas CAST P. Tá dianchosc ar níos mó ná aon chuntas EPSO amháin a bheith agat agus féadfar thú a dhícháiliú ag céim ar bith den phróiseas roghnúcháin más amhlaidh atá níos mó ná cuntas EPSO amháin agat. Déan teagmháil linn má tá amhras ort faoin méid sin. Má fhaigheann EPSO amach ag aon chéim den phróiseas gur chruthaigh tú níos mó ná aon chuntas EPSO amháin, is féidir go gcuirfear amach ón bpróiseas thú (féach na rialacha ginearálta maidir le comórtais oscailte a ghabhann leis an bhfógra comórtais). 

Cé go bhfuil cead ag iarrthóirí roinnt próifílí a bheith acu ar Thairseach Aonair na nIarrthóirí, tá dianchosc fós ar níos mó ná iarratas amháin a dhéanamh ar an gcomórtas céanna (féach an fógra comórtais chun na sonraí ar fad a fháil).  

Ní mór do chuid sonraí pearsanta agus na sonraí i ndáil le rochtain ar do chuntas iarrthóra a choinneáil cothrom le dáta i gcónaí.