L-EPSO huwa ddedikat biex jiżgura opportunitajiet indaqs u aċċess għall-proċeduri ta’ selezzjoni tiegħu għall-kandidati kollha. Għal dan l-għan hu jimmonitorja kontinwament il-proċessi tal-ittestjar u ta’ selezzjoni tiegħu biex jiżgura li dan il-prinċipju jiġi rispettat. L-EPSO jipprovdi l-opportunità lill-kandidati kollha biex jindikaw jekk għandhomx xi ħtiġijiet speċifiċi minħabba diżabbiltà jew kundizzjoni medika, li jkunu jeħtieġu akkomodazzjonijiet raġonevoli (jiġifieri aġġustamenti) fi kwalunkwe stadju tas-seduta tat-testijiet. Din l-informazzjoni tiġi kkomunikata b’mod ċar mill-bidu fuq is-sit web tal-EPSO, fil-formola tal-applikazzjoni u f’kull Avviż tal-Kompetizzjoni individwali (għall-kompetizzjonijiet ġenerali) jew sejħa għal espressjoni ta’ interess (għas-selezzjonijiet tal-CAST).

L-EPSO żviluppa materjal promozzjonali biex jispjega l-proċess ta’ akkomodazzjoni raġonevoli u jinforma lill-kandidati dwar kif jitolbu aġġustamenti fit-testijiet ta’ selezzjoni. Għal aktar informazzjoni dwar l-approċċ tal-EPSO għall-ugwaljanza u d-diversità, jekk jogħġbok żur il-paġna web tal-EPSO dwar l-opportunitajiet indaqs. Biex tara l-filmat dwar kif titlob aġġustamenti speċjali fit-testijiet ta’ selezzjoni, żur il-paġna web tal-EPSO ddedikata għall-ugwaljanza. 
Barra minn hekk, huwa disponibbli wkoll flyer pass pass dwar il-proċedura ta’ akkomodazzjonijiet raġonevoli (dan jista’ jiġi pprovdut bil-Braille, fuq talba).

Din il-ħarsa ġenerali tippreżenta xi akkomodazzjonijiet possibbli li l-kandidati jistgħu jitolbu għat-testijiet ta’ selezzjoni. Se tiġi aġġornata, kif rilevanti.

Għal kull tip ta’ akkomodazzjoni, għandek issib hawn taħt:

• Deskrizzjoni tal-akkomodazzjoni (“xiex?”).
• L-istadju tal-proċess ta’ selezzjoni meta din l-akkomodazzjoni tista’ tingħata (“meta?”).
• Pjattaforma jew postijiet tal-ittestjar online fejn tista’ tingħata din l-akkomodazzjoni, jew fl-UE jew fid-dinja (“fejn?”).
• Min hu responsabbli biex jipprovdi l-akkomodazzjoni (“min?”).

Din il-lista hija indikattiva u mhux eżawrjenti. Hi għandha l-għan li turi l-akkomodazzjonijiet u l-funzjonalitajiet possibbli tat-tagħmir tal-IT u mhijiex kuntrattwali. L-EPSO se jagħmel l-almu tiegħu biex jipprovdi lill-kandidati bl-akkomodazzjonijiet raġonevoli meħtieġa.