Għandi diżabbiltà jew kundizzjoni medika li teħtieġ aġġustamenti tat-testijiet tas-selezzjoni għall-proċedura CAST Permanent. Xi rrid nagħmel?
Tista’ titlob aġġustamenti speċjali tat-testijiet tas-selezzjoni għall-proċedura tal-CAST Permanenti fil-formola tal-applikazzjoni tiegħek billi timmarka l-kaxxa “rekwiżiti speċjali”. Se jkollok bżonn ukoll timla formola ta’ informazzjoni dettaljata dwar il-ħtiġijiet speċjali tiegħek u tibagħtilna d-dokumenti ta’ sostenn rilevanti.
Jekk tingħata arranġamenti raġonevoli għat-testijiet organizzati mill-EPSO, int se tiġi infurmat dwar id-dettalji qabel id-data tat-test tiegħek. F’xi każijiet, id-definizzjoni u l-organizzazzjoni tal-aġġustamenti neċessarji jistgħu jieħdu xi ftit taż-żmien u għalhekk għandu mnejn tiġi mistieden tagħmel dawn it-testijiet matul il-perjodu tal-ittestjar li jmiss. Jekk dan ikun il-każ ninfurmawk kemm jista’ jkun malajr.
L-EPSO se jiżgura li l-kandidati preselezzjonati (fil-lista preliminari) kollha jiġu mistiedna u ttestjati fl-aħjar kundizzjonijiet possibbli.
Jekk jogħġbok innota li testijiet oħra (ta’ reklutaġġ) bħal intervisti huma organizzati direttament mis-servizzi tar-reklutaġġ. Jekk ikollok bżonn aġġustamenti speċjali fl-istadju tat-testijiet tar-reklutaġġ, jekk jogħġbok informa lil min hu inkarigat mir-reklutaġġ hekk kif tirċievi stedina għat-testijiet tar-reklutaġġ. Jekk jogħġbok innota li l-EPSO mhu se jaqsam ebda informazzjoni dwar il-kundizzjoni jew il-ħtiġijiet speċjali tiegħek ma’ min hu inkarigat mir-reklutaġġ.