Tá ról lárnach ag baill foirne ar conradh maidir le tacú le hobair institiúidí, chomhlachtaí agus ghníomhaireachtaí an Aontais Eorpaigh.

Cabhraíonn siad trí chúraimí riaracháin sealadacha a dhéanamh nó forlíonann siad réimsí speisialaithe ina bhfuil gá le scileanna breise.

Eagraíonn an Oifig Eorpach um Roghnú Foirne (EPSO) próisis roghnúcháin do bhaill foirne ar conradh, ar a dtugtar CAST Buan chomh maith. Is uirlis um roghnú ball foirne ar conradh é CAST, agus is é an chiall atá le ‘Buan’ gur féidir iarratas a dhéanamh am ar bith trí chóras clárúcháin leanúnaigh.

Príomhchéimeanna an phróisis roghnúcháin

1. Iarratas

Is ar chlárú leanúnach atá an próiseas roghnúcháin do bhaill foirne ar conradh bunaithe, is é sin gur féidir leat iarratas a dhéanamh tráth ar bith.

Chun páirt a ghlacadh:

• Féach rannán na mball foirne ar conradh agus roghnaigh an phróifíl is fearr a oireann do do chúlra oideachasúil agus gairmiúil.
• Léigh na doiciméid thábhachtacha uile, go háirithe an glao ar léiriú spéise.
• Cliceáil ar ‘Déan iarratas’ chun logáil isteach i do chuntas EPSO uathúil. Mura bhfuil cuntas agat, cruthaigh ceann chun tosú.
• Nuair a bheidh tú logáilte isteach, líon isteach do shonraí pearsanta, oideachasúla agus gairmiúla i do chuntas EPSO. Tríd an méid sin a dhéanamh, tá tú ag clárú i mbunachar sonraí EPSO le haghaidh baill foirne ar conradh.
• Is féidir leat do phróifíl a nuashonrú tráth ar bith chun go léireofar taithí nó scileanna nua inti.

2. Gearrliostú

Nuair a thagann riachtanais earcaíochta chun cinn, déanann seirbhísí earcaíochta institiúidí, chomhlachtaí agus ghníomhaireachtaí an Aontais bunachar sonraí EPSO le haghaidh baill foirne ar conradh a chuardach agus cuireann siad na hiarrthóirí is fearr a oireann do riachtanais an phoist ar ghearrliosta.

3. Trialacha

Tugtar cuireadh d’iarrthóirí atá ar an ngearrliosta trialacha réasúnaíochta ar ríomhaire a dhéanamh arna n-eagrú ag EPSO, ina ndéanfar measúnú ar an méid seo a leanas:

• Réasúnaíocht bhriathartha
• Réasúnaíocht uimhriúil
• Réasúnaíocht theibí

Earcaíocht

Na hiarrthóirí a n-éireoidh leo sna trialacha, is féidir go dtabharfar cuireadh chun agallaimh dóibh leis an institiúid earcaíochta.
Is féidir post mar bhall foirne ar conradh a thairiscint d’agallaithe a n-éireoidh leo.

Nótaí tábhachtacha

• D’fhéadfadh an próiseas roghnúcháin a bheith beagán éagsúil ó institiúid go hinstitiúid, ag brath ar a riachtanais.
• Tá gach institiúid freagrach as agallaimh a dhéanamh agus as cinntí deiridh earcaíochta a bhainistiú.
• Is féidir leat clárú le haghaidh próifílí éagsúla a mheaitseálann do scileanna agus do thaithí.

Réidh le hiarratas a dhéanamh?

Cláraigh anois i mbunachar sonraí EPSO le haghaidh baill foirne ar conradh