It-tranżizzjoni għal ittestjar online għall-kompetizzjonijiet kollha tal-EPSO hi għażla strateġika approvata mill-Bord tat-Tmexxija tiegħu (il-korp governattiv interistituzzjonali tal-EPSO). L-objettiv tagħna hu li nkunu aktar rapidi u aktar moderni, filwaqt li nikkontribwixxu għall-“politika ekoloġika” tal-UE u niżguraw il-kosteffiċjenza. Dan hu żvilupp evoluzzjonarju li jġib lill-EPSO konformi mal-istandards internazzjonali attwali għall-proċeduri ta’ selezzjoni tal-istaff fuq skala kbira.

L-EPSO jifhem li l-ittestjar online hu xi ħaġa ġdida għal ħafna nies. Irridu niżguraw li l-kandidati kollha jkunu jistgħu jiffamiljarizzaw ruħhom mal-mod kif l-ittestjar online jaħdem fil-prattika. Għal din ir-raġuni ħloqna numru ta’ noti pubbliċi li għandhom l-għan li jagħtuk kemm jista’ jkun informazzjoni u gwida, qabel ma tapplika għall-proċeduri ta’ selezzjoni tagħna u tiġi mistieden għat-test.

Mill-2023, il-kompetizzjonijiet kollha bdew isiru permezz ta’ testijiet online kif deċiż mill-bord tat-tmexxija tal-EPSO. Dan iġib miegħu ffrankar sinifikanti tal-ispejjeż u żieda tal-effiċjenza, u huwa wkoll aktar favur l-ambjent.

L-ittestjar online permezz tal-kuntrattur estern tagħna jippermetti lill-kandidati jagħmlu t-testijiet minn kwalunkwe post filwaqt li tiġi żgurata l-integrità tat-testijiet.

L-ittestjar online jippermetti lill-EPSO jagħmel progress aktar mgħaġġel fl-organizzazzjoni tal-kompetizzjonijiet.