Trialacha réasúnaíochta briathartha, uimhriúla agus teibí

Beidh na trialacha réasúnaíochta briathartha, uimhriúla agus teibí fós ina gcuid de na próisis roghnúcháin. Go hiondúil, ní dhéanfar na torthaí a rangú agus ní bheidh ag teastáil ón iarrthóir ach pasmharc. Féadfar ualú éagsúil a thabhairt do gach ceann de na trí scil sin faoi leith, de réir na próifíle atá le roghnú. 

Triail eolais faoin Aontas Eorpach i gcás na gcomórtas ginearálta
Ceistneoir ilrogha faoin réimse lena mbaineann i gcás na gcomórtas do speisialtóirí

Sa triail eolais faoin Aontas Eorpach, mar shampla, díreofar ar cheisteanna tábhachtacha ábhartha a bhaineann le feidhmiú an Aontais, lena bheartais agus lena nósanna imeachta.

Beidh deis ag na hiarrthóirí breathnú ar na foinsí ar líne a úsáidtear chun an triail sin a chruthú, rud a fhágfaidh go mbeidh sé inrochtana fiú dóibh siúd nach ndearna staidéar ar ghnóthaí an Aontais san ollscoil nó nach raibh ag obair sa réimse sin roimhe. Foilseofar na hábhair fhoinseacha a úsáidfear chun an triail sin a chruthú an t-am céanna a fhoilseofar an fógra comórtais.

Ní fhoilseoidh EPSO aon ábhar foinseach le haghaidh an cheistneora ilrogha a bhaineann leis an réimse i gcás na gcomórtas do speisialtóirí.

Cás-staidéar

Beidh cás-staidéar san áireamh i roinnt comórtas chun scileanna cumarsáide scríofa (i.e. scileanna dréachtaithe) na n-iarrthóirí a mheas.

Triail scríofa

Agus EPSO ag bogadh i dtreo córas iomlán 24 theanga, tabharfaidh sé cineál nua trialach isteach ina phróisis roghnúcháin amhail ó 2024: an triail scríofa, darb aidhm measúnú a dhéanamh ar scileanna cumarsáide scríofa na n-iarrthóirí. Tiocfaidh an triail scríofa in ionad an chás-staidéir*.

Faoin téarma ‘triail scríofa’, tá trí chineál éagsúla trialacha ann a mbainfidh EPSO úsáid astu de réir na riachtanas a chuirfidh na seirbhísí earcaíochta in iúl le haghaidh gach comórtais:

1.        Triail scríofa a bhaineann le réimse/réimsí an chomórtais, lena ndéantar measúnú ar scileanna cumarsáide scríofa agus na scileanna sin amháin. 
2.        Triail scríofa réimse-shonrach lena ndéantar measúnú ar scileanna cumarsáide scríofa agus ar eolas an iarrthóra i réimse ábhartha an chomórtais.
3.        Aiste shaorthéacs ar chúrsaí an Aontais Eorpaigh, lena ndéantar measúnú ar scileanna cumarsáide scríofa agus na scileanna sin amháin. 

Beidh ar na hiarrthóirí freagra a thabhairt ar thasc nó ar thascanna na trialach bunaithe ar na doiciméid a chuireann EPSO ar fáil agus a bhaineann le réimse/réimsí an chomórtais, mar a shonraítear san fhógra comórtais.

Ní triail teanga atá sa triail scríofa. Déanfar measúnú ar iarrthóirí ar bhonn na n-ancairí sonracha atá liostaithe thíos (is éard is ‘ancairí’ ann na gnéithe a chuireann na marcálaithe trialacha, i.e. na measúnóirí, san áireamh agus measúnú á dhéanamh acu ar inniúlacht ar leith).

‘Ancairí’ le haghaidh scileanna cumarsáide scríofa:

Déanann an t-iarrthóir an méid seo a leanas:

• Scríobhann sé go hachomair gan focail agus abairtí a úsáid nach bhfuil gá leo.
• Cuireann sé ábhar i láthair ar bhealach intuigthe.
• Déanann sé a chuid scríbhneoireachta a oiriúnú dóibh siúd ar a bhfuil sé ag díriú agus don chuspóir atá beartaithe.
• Úsáideann sé an t-eolas a chuirtear ar fáil chun déileáil leis an tasc.
• Déanann sé an chumarsáid scríofa a struchtúrú le sreabhadh loighciúil smaointe.

*Leanfar de na cás-staidéir a úsáid le haghaidh roinnt comórtas atá ar siúl cheana féin.

Triail scileanna digiteacha

Tabharfar isteach triail scileanna digiteacha i gcomórtais áirithe, i gcomhréir le riachtanais na n-institiúidí agus na gcomhlachtaí den Aontas Eorpach a bhfreastalaíonn EPSO orthu.