Tá na hinstitiúidí ag lorg iarrthóirí éirimiúla spreagtha, a bhfuil ardcháilíochtaí acu sa réimse i gceist, iarrthóirí a bhfuil na hinniúlachtaí ginearálta seo thíos acu:

• Anailísiú agus réiteach fadhbanna: príomhphointí ceisteanna casta a aimsiú agus réitigh atá cruthaitheach, soiléir agus praiticiúil a cheapadh
• Cumarsáid: cumarsáid chruinn shoiléir a dhéanamh, ó bhéal agus i scríbhinn
• Obair ardcháilíochta a dhéanamh agus torthaí a bhaint amach: freagrachtaí a ghlacadh agus a bheith tionscantach ar mhaithe le hobair d'ardchaighdeán a dhéanamh, laistigh de nósanna imeachta atá leagtha síos
• Foghlaim agus forbairt: scileanna pearsanta agus eolas ar an eagraíocht agus ar an láthair oibre a fhorbairt agus a fheabhsú
• Tosaíochtaí a chur in ord tábhachta agus eagrúchán: cúraimí a chur in ord tábhachta, oibriú go solúbtha, agus an t-ualach oibre a eagrú go héifeachtúil
• Buanseasmhacht: a bheith éifeachtach, fiú amháin nuair atá ualach mór oibre ann, deacrachtaí eagraíochtúla a shárú ar bhealach dearfach agus a bheith in ann dul in oiriúint d'athruithe sa láthair oibre.
• Obair Bhuíne: oibriú i gcomhar le gar-chomhghleacaithe agus le comhghleacaithe i seirbhísí eile, agus na héagsúlachtaí atá idir daoine a chur san áireamh.
• Ceannaireacht (riarthóirí amháin): daoine a bhainistiú, a n-inniúlachtaí a fhorbairt agus iad a spreagadh sa chaoi is go mbainfidh siad a gcuid spriocanna amach.

Ina theannta sin, tá iarrthóirí a bhfuil ardcháilíochtaí acu sa réimse i gceist, á lorg ag na hinstitiúidí le haghaidh na sainphróifílí. Tá eolas ar fáil san Fhógra comórtais ar na hinniúlachtaí réimse-shonracha, agus ar na trialacha lena ndéantar na hinniúlachtaí ginearálta agus na hinniúlachtaí réimse-shonracha a mheas.

Tá sé beartaithe ag EPSO creat inniúlachta nua a úsáid ó 2023 ar aghaidh. Is féidir leat níos mó a fhoghlaim faoi anseo.

Is é ról ginearálta na riarthóirí tacú le cinnteoirí chun misean a n-institiúide nó a gcomhlachta á chomhlíonadh. Is minic gurb é AD 5 an grád ag a dtosaíonn céimithe a ngairmréim mar riarthóirí in institiúidí an Aontais Eorpaigh. Na riarthóirí a earcaítear ar an ngrád sin, is féidir leo trí chineal oibre a dhéanamh go príomha sna hinstitiuidí, ach maoirseacht a dhéanamh orthu: ceapadh beartas, seachadadh oibríochtúil agus bainistiú acmhainní.

Tá liosta na bpríomhdhualgas san Fhógra Comórtais, dualgais is féidir a bheith ó institiúid dá chéile.

Lena chois sin, is féidir féachaint ar ár suíomh gréasáin chun teacht ar eolas úsáideach faoi oifigigh bhuana.

Is gnách go mbíonn ról feidhmiúcháin agus teicniúil (riarachán, airgeadas, cumarsáid, taighde, forbairt agus cur chun feidhme beartas srl.) ag cúntóirí. Tá ról tábhachtach acu i mbainistíocht inmheánach na n-institiúidí go háirithe i ngnóthaí buiséid agus airgeadais, acmhainní daonna, ríomhaireacht, bainistiú doiciméad agus obair saotharlainne.

• Baineann gairm an chúntóra leis na gráid AST 1 go AST 11.
• Is ag grád AST 1 nó AST 3 is gnách d'fhostaithe nua dul i gceann oibre.
• Ba cheart d'iarrthóirí ar AST 1 oideachas meánscoile, agus taithí ábhartha, nó gairmcháilíocht chuí a bheith acu.
• Ar bhonn ginearálta ba cheart d'iarrthóirí ar ghrád AST 3 oideachas meánscoile, gairmcháilíocht chuí agus/nó roinnt blianta de thaithí ábhartha a bheith acu.

Is gnách go mbíonn ról bainistíochta oifige agus tacaíochta riaracháin ag Rúnaithe/Cléirigh. Lena chois sin, d'fhéadfadh fairsinge cúraimí eile a bheith orthu amhail comhaid a ullmhú, tacú le heagrú agus comhordú ghníomhaíochtaí na roinne, doiciméid a bhainistiú agus mórán eile nach iad i dtaca le cuidiú le foirne, le bainisteoirí, agus le seirbhísí eile in institiúidí an Aontais Eorpaigh.

• Baineann gairmréim an rúnaí/chléirigh le grád AST/SC1 go grád AST/SC6.
• Is ag grád AST/SC 1 nó AST/SC 2 is gnách d'fhostaithe nua dul i gceann oibre.
• Ní mór d’iarrthóirí ar ghrád AST/SC1 oideachas meánscoile agus taithí oibre ábhartha a bheith acu, é sin nó gairmcháilíocht ábhartha.
• In amanna bíonn grád AST/SC2 ar fáil d'iarrthóirí a bhfuil níos mó taithí acu.

Is trí chomórtais oscailte a roghnaíonn institiúidí an Aontais Eorpaigh iarrthóirí do bhuanchonarthaí. Bíonn tástálacha agus cleachtaí measúnaithe ann atá ceaptha do scileanna gairmiúla agus príomhinniúlachtaí ar leith a thomhas. I ngeall ar an líon mór iarrthóirí a chláraíonn do na comórtais, is é seo an próiséas roghnúcháin is cothroime agus is trédhearcaí dá bhfuil ann. Ní ghlactar le hiarratais spontáineacha, dá bhrí sin.

Is trí chomórtais oscailte a eagrú a roghnaíonn institiúidí an Aontais Eorpaigh iarrthóirí ar chonarthaí buana. Fógraítear gach ceann de na comórtais sin trí fhógra comórtais a fhoilsiú in Iris Oifigiúil an Aontais Eorpaigh, agus ar shuíomh gréasáin EPSO. San fhógra comórtais, tá cur síos iomlán ar an bpróifíl atá á lorg, ar na bunriachtanais oideachais, (agus in amanna an taithí oibre) agus tá léiriú ann ar na trialacha agus ar na cleachtaí measúnaithe (atá ceaptha chun d’inniúlachtaí gairmiúla agus príomhinniúlachtaí áirithe a mheas) a bheidh ar siúl le linn an chomórtais. Tá eolas agus treoracha san fhógra comórtais freisin faoi conas iarratas a dhéanamh ar an gcomórtas oscailte. De ghnáth, foilsítear an fógra comórtais ar an gcéad lá den tréimhse iarratais.

I ngeall ar an líon mór iarrthóirí a chuireann isteach ar na comórtais, measann EPSO gurb é sin an dóigh is cothroime agus is trédhearcaí dá bhfuil ann le hiarrthóirí a roghnú. Ní chuirfear iarratais gan choinne san áireamh mar sin.

Beidh a bhord roghnúcháin féin ag gach próiseas roghnúcháin, le haghaidh oifigigh bhuana, agus is air a bhíonn an cúram iarrthóirí a roghnú ag gach céim agus an liosta deiridh d'iarrthóirí ar éirigh leo, a thiomsú. Tá an bord roghnúcháin comhdhéanta d'oifigigh ó institiúidí an Aontais Eorpaigh, agus is iondúil go mbíonn idir Chomhaltaí Buana agus Chomhaltaí Neamh-bhuana ina measc. Tugtar na Comhaltaí Buana ar iasacht óna n-institiúid ar feadh tréimhse 2 go 4 bliana de ghnáth chun comhsheasmhacht idir na próisis roghnúcháin a chinntiú. Ceaptar na Comhaltaí Neamh-bhuana le próiseas roghnúcháin áirithe mar gheall ar a gcuid saineolais theicniúil nó teanga, mar shampla.

Scála idir grád AD 5 agus grád AD 16 a bhíonn i gceist i ngairmréim an riarthóra. 

Is é AD 5 an grád tosaigh do chéimithe ollscoile de ghnáth. I bhformhór na gcásanna, níl aon taithí oibre ag teastáil.

D'fhéadfaí thú a roghnú agus a earcú freisin ag grád AD 5 / AD 6 / AD 7 i róil lena mbaineann speisialtóireacht níos mó. Beidh roinnt blianta de thaithí ábhartha ag teastáil sna róil sin. 

Gráid mheánbhainistíochta iad na gráid AD 9 / AD 12. Ní féidir duine a roghnú/earcú ag an ngrád sin mura bhfuil taithí bainistíochta aige cheana.