Cúntóirí i réimse an airgeadais

An bhfuil taithí i réimse an airgeadais agat? Ar mhaith leat tús a chur le gairmréim idirnáisiúnta laistigh d’fhoireann ilchultúrtha ilchineálach? Dá mba mhaith, léigh leat.

Tá an tAontas Eorpach ag lorg gairmithe sna réimsí seo a leanas: bainistíocht airgeadais, cuntasaíocht agus ciste, agus soláthar poiblí. Is ag grád cúntóra AST 3 a earcófar na hiarrthóirí a n-éireoidh leo.

Tá deiseanna ar fáil d’iarrthóirí a bhfuil aon cheann de na próifílí thíos acu. Tabhair do d’aire nach féidir iarratas a dhéanamh ach ar aon réimse amháin.

Réimse 1 – Bainistíocht airgeadais: Ar na príomhchúraimí a bheidh ort, beidh cúnamh a thabhairt chun na nithe seo a leanas a dhéanamh: an buiséad bliantúil a ullmhú agus a fhorfheidhmiú agus monatóireacht a dhéanamh air; sainchomhaid airgeadais a chur ar bun; monatóireacht a dhéanamh ar chonarthaí, ar chomhaontuithe deontais, agus ar chomhaontuithe ar leibhéal na seirbhíse; bainistíocht airgeadais fhónta a chinntiú; pleananna gníomhaíochta/moltaí iniúchóireachta a chur chun feidhme; comhairle a thabhairt do na haonaid oibríochtúla faoi oibríochtaí buiséadacha agus airgeadais a bhainistiú; tuarascálacha/staidreamh airgeadais a tharraingt suas.
Réimse 2 – Cuntasaíocht agus ciste: Ar na príomhchúraimí a bheidh ort, beidh cúnamh a thabhairt chun na nithe seo a leanas a dhéanamh: máistirshonraí agus cuntais bhainc na n-eintiteas dlíthiúil a fhíorú; sonraisc a bhainistiú; íocaíochtaí údaraithe a dhéanamh agus monatóireacht a dhéanamh orthu; aisghabháil méideanna is infhaighte agus iontrálacha cuntasaíochta gaolmhara a dhéanamh; sócmhainní, dímheas agus fardail a bhainistiú; aisghabhálacha CBL; rialuithe rialta airgeadais agus cuntasaíochta a dhéanamh; an ciste a bhainistiú; tuarascálacha a dhréachtú; oiliúint agus tacaíocht a chur ar fáil i gcúrsaí cuntasaíochta.
Réimse 3 – Soláthar poiblí: Ar na príomhchúraimí a bheidh ort, beidh cúnamh a thabhairt chun na nithe seo a leanas a dhéanamh: nósanna imeachta soláthair phoiblí a chlárú agus a chur chun feidhme; freagraí a dhréachtú, iarrataí ar fhaisnéis/soiléiriú, litreacha maidir le nósanna imeachta tairisceana; cúnamh a thabhairt monatóireacht dhlíthiúil agus airgeadais a dhéanamh ar chonarthaí; córais ríomhsholáthair a dhearadh, a fhorbairt agus a chothabháil; oiliúint agus tacaíocht a chur ar fáil do na seirbhísí oibríochtúla maidir le rialacha soláthair phoiblí agus dea-chleachtais.

Tá eolas mionsonraithe faoi dhualgais shonracha an phoist le fáil san fhógra comórtais (féach Iarscríbhinn II – Príomhdhualgais).

Éagsúlacht agus Cuimsiú

Don duine atá fostaithe acu, cuireann institiúidí agus comhlachtaí an Aontais Eorpaigh pobal saineolais ar fáil maille le cuid mhór deiseanna ar a fhorbairt phearsanta agus a fhorbairt ghairmiúil a leathnú. Na foirne ilchultúrtha idirnáisiúnta ilchineálacha a bhíonn ag obair i státseirbhís an Aontais Eorpaigh, bíonn siad ag obair ar son tuairim agus 450 milliún saoránach den Aontas agus tuilleadh nach iad.

Tá institiúidí agus comhlachtaí an Aontais a n-oibríonn EPSO dóibh tiomanta don éagsúlacht agus don chuimsiú. Féachann siad leis an éagsúlacht a bhaint amach go gníomhach agus cuireann siad an cuimsiú chun cinn i measc a mball foirne. Dá bhrí sin, is mór ag EPSO iarratais ó iarrthóirí cáilithe ó chúlraí éagsúla agus ón mbonn geografach is leithne is féidir i measc Bhallstáit an Aontais Eorpaigh. Tá tuilleadh eolais faoin Éagsúlacht agus Cuimsiú in institiúidí agus comhlachtaí an Aontais le fáil ar an leathanach gréasáin tiomnaithe seo.

An bhfuil an mianach ceart ionat?

Ní ghlacfar le hiarratais ach ó shaoránaigh den Aontas Eorpach a bhfuil cearta iomlána acu mar shaoránaigh den Aontas.

Ní mór eolas cuimsitheach a bheith agat ar cheann amháin de theangacha oifigiúla an Aontais agus eolas sásúil a bheith agat ar cheann eile de theangacha oifigiúla an Aontais.

Ní mór an méid seo a leanas a bheith agat chomh maith:

leibhéal iar-mheánoideachais dhá bhliain ar a laghad ar baineadh dioplóma amach dá bharr, agus taithí oibre ábhartha trí bliana ar a laghad a fuarthas ina dhiaidh sin. Is féidir leis an dioplóma a bheith sna réimsí seo a leanas:
- I gcás réimse 1: eacnamaíocht, riarachán poiblí, riarachán gnó, cuntasaíocht, airgeadais/bainistíocht airgeadais, nó dlí
- I gcás réimse 2: cuntasaíocht nó airgeadas/bainistíocht airgeadais
- I gcás réimse 3: eacnamaíocht, riarachán poiblí, riarachán gnó, cuntasaíocht, airgeadais/bainistíocht airgeadais, nó dlí

sin nó

leibhéal oideachais meánscoile ar baineadh dioplóma amach dá bharr lenar féidir leanúint ar aghaidh go dtí an t-oideachas iar-mheánscoile, agus taithí oibre ábhartha 6 bliana ar a laghad a fuarthas ina dhiaidh sin.

24 theanga oifigiúla de chuid an Aontais Eorpaigh le haghaidh na dtrialacha

Féadfaidh na hiarrthóirí aon dá cheann de 24 theanga oifigiúla an Aontais Eorpaigh a roghnú le haghaidh na dtrialacha.

Nuair a chuirfear na hiarrthóirí a n-éireoidh leo ar phainéal, féadfaidh seirbhísí earcaíochta chomhlachtaí agus institiúidí an Aontais Eorpaigh ar spéis leo a bpróifíl dul i dteagmháil leo chun agallaimh earcaíochta spriocdhírithe a dhéanamh. Na hagallaimh sin agus aon phróiseas gaolmhar eile, tá siad lasmuigh den phróiseas roghnúcháin a dhéanann EPSO. Is iad na seirbhísí earcaíochta ábhartha a dhéanann na hagallaimh earcaíochta, i mBéarla agus/nó i bhFraincis de ghnáth. Féadfar teangacha eile a úsáid le linn na n-agallamh freisin, de réir riachtanais na seirbhísí earcaíochta agus an eolais a chuir na hiarrthóirí in iúl ina n-iarratas.

Tá eolas mionsonraithe faoi na riachtanais le fáil san fhógra comórtais ar an leathanach iarratais thíos.

Is féidir iarratas a dhéanamh ón 25 Iúil 2024 go dtí an 3 Meán Fómhair 2024, ar 12:00 (meán lae), am na Bruiséile.

Tús a chur leis - Cúntóirí – Bainistíocht airgeadais

Tús a chur leis - Cúntóirí – Cuntasaíocht agus cistíocht

Tús a chur leis - Cúntóirí – Soláthar poiblí