Chun iarratas a dhéanamh, ní mór duit na coinníollachta iontrála seo a leanas a chomhlíonadh:

• A bheith i do náisiúnach den Aontas Eorpach agus cearta iomlána mar shaoránach den Aontas a bheith agat.
• Ní mór eolas cuimsitheach a bheith agat ar cheann amháin de theangacha oifigiúla an Aontais agus eolas sásúil a bheith agat ar cheann eile de theangacha oifigiúla an Aontais.
   

Ní mór an méid seo a leanas a bheith agat chomh maith:

• céim ollscoile 3 bliana ar a laghad i gceann amháin nó níos mó de na réimsí seo a leanas: cánachas náisiúnta nó idirnáisiúnta; dlí; eacnamaíocht; airgeadas; bainistíocht ghnó nó riarachán gnó; cuntasaíocht, agus 4 bliana ar a laghad de thaithí oibre ábhartha a fuarthas ina dhiaidh sin.
  *Measfar an riachtanas oideachais a bheith comhlíonta i gcásanna ina mbeidh céim ollscoile bainte amach ag an iarrthóir i réimse eile, ach cúrsa acadúil a mhair bliain acadúil amháin a bheith críochnaithe aige ina dhiaidh sin agus dioplóma bainte amach aige dá bharr i gceann de na réimsí atá sonraithe thuas, ar choinníoll go measfar gurb ionann an staidéar atá i gceist agus staidéar ollscoile a mhair trí bliana ar a laghad (i.e. cúrsa tiontúcháin).

nó

• céim ollscoile 4 bliana ar a laghad i gceann de na réimsí atá liostaithe thuas, agus 3 bliana ar a laghad de thaithí oibre ábhartha.
  *Measfar an riachtanas oideachais a bheith comhlíonta i gcásanna ina mbeidh ardchéim ag an iarrthóir (máistreacht, PhD nó a gcomhionann) i gceann amháin de na réimsí atá sonraithe thuas, gan beann ar réimse an staidéir a chuir an t-iarrthóir i gcrích roimhe.

nó

• céim ollscoile 3 bliana ar a laghad i réimse seachas na cinn atá liostaithe thuas, agus 6 bliana ar a laghad de thaithí oibre ábhartha a fuarthas ina diaidh sin.

Féadfaidh na hiarrthóirí aon dá cheann de 24 theanga oifigiúla an Aontais Eorpaigh a roghnú le haghaidh na dtrialacha.

Nuair a chuirfear na hiarrthóirí a n-éireoidh leo ar phainéal, féadfaidh seirbhísí earcaíochta chomhlachtaí agus institiúidí an Aontais Eorpaigh ar spéis leo a bpróifíl dul i dteagmháil leo chun agallaimh earcaíochta spriocdhírithe a dhéanamh. Na hagallaimh sin agus aon phróiseas gaolmhar eile, tá siad lasmuigh den phróiseas roghnúcháin a dhéanann EPSO. Is iad na seirbhísí earcaíochta ábhartha a dhéanann na hagallaimh earcaíochta, i mBéarla agus/nó i bhFraincis de ghnáth. Féadfar teangacha eile a úsáid le linn na n-agallamh freisin, de réir riachtanais na seirbhísí earcaíochta agus an eolais a chuir na hiarrthóirí in iúl ina n-iarratas.

Don duine atá fostaithe acu, cuireann institiúidí agus comhlachtaí an Aontais Eorpaigh pobal saineolais ar fáil maille le cuid mhór deiseanna ar a fhorbairt phearsanta agus a fhorbairt ghairmiúil a leathnú. Na foirne ilchultúrtha idirnáisiúnta ilchineálacha a bhíonn ag obair i státseirbhís an Aontais Eorpaigh, bíonn siad ag obair ar son tuairim agus 450 milliún saoránach den Aontas agus tuilleadh nach iad.

Tá institiúidí agus comhlachtaí an Aontais a n-oibríonn EPSO dóibh tiomanta don éagsúlacht agus don chuimsiú. Féachann siad leis an éagsúlacht a bhaint amach go gníomhach agus cuireann siad an cuimsiú chun cinn i measc a mball foirne. Dá bhrí sin, is mór ag EPSO iarratais ó iarrthóirí cáilithe ó chúlraí éagsúla agus ón mbonn geografach is leithne is féidir i measc Bhallstáit an Aontais Eorpaigh. Tá tuilleadh eolais faoin Éagsúlacht agus Cuimsiú in institiúidí agus comhlachtaí an Aontais le fáil ar an leathanach gréasáin tiomnaithe seo.