Hawn taħt issib uħud mid-diversi traineeships li l-Bank Ewropew tal-Investiment (BEI) joffri fil-Lussemburgu.

 

Programmi ta’ Traineeships u għall-Gradwati

Huma jagħtuk l-opportunità li tikseb esperjenza professjonali fil-qasam ta’ studji li tagħżel, bil-benefiċċju miżjud li tikseb għarfien tax-xogħol tal-Bank.

Dawn għandhom tul ta’ bejn tlieta u ħames xhur (sitt xhur jekk jintalbu mill-universitajiet).

Eliġibbiltà

Biex tkun eliġibbli, trid jew tkun:

• fl-aħħar sena tiegħek fl-università,

jew

• gradwat b’inqas minn sena esperjenza ta’ xogħol (mill-aħħar lawrja, esklużi l-internships),

kif ukoll

• ċittadin tal-UE jew ċittadin ta’ pajjiż kandidat,
• profiċjenti fl-Ingliż u/jew fil-Franċiż (l-għarfien ta’ lingwi oħra tal-UE se jkun ta’ vantaġġ).

Dati ta’ ammissjoni

L-1 ta’ Frar u l-1 ta’ Settembru. Dawn tipikament jitħabbru bejn wieħed u ieħor erba’ xhur qabel kull dħul. 

Se tkun responsabbli għall-akkomodazzjoni tiegħek stess, iżda se titħallas allowance ta’ kull xahar b’rata fissa biex tgħin fl-ispejjeż tal-għajxien u se tingħata rimborż tal-ispejjeż tal-ivvjaġġar (vjaġġ bir-ritorn wieħed mill-punt ta’ oriġini tiegħek).

Programm ta’ Traineeship tal-Faċilità Ewro-Mediterranja ta’ Sħubija ta’ Investiment (FEMIP)

Il-programm ta’ traineeship tal-FEMIP għandu l-għan li jibni l-kapaċità umana fil-Pajjiżi Sħab tal-Mediterran billi joffri opportunitajiet lil kandidati żgħażagħ b’talent, li jixtiequ jikkontribwixxu għat-titjib tal-ħajja tan-nies billi jippromwovu l-progress ekonomiku u soċjali fil-Pajjiżi Sħab tal-Mediterran.

Huma jniedu l-programm kull sena fil-ħarifa għall-Pajjiżi Sħab li daħlu fi Ftehim Qafas mal-Bank Ewropew tal-Investiment (l-Alġerija, l-Eġittu, il-Palestina*, Iżrael, il-Ġordan, il-Libanu, il-Marokk u t-Tuneżija).

L-għan tal-Programm ta’ Traineeship tal-FEMIP tagħna huwa li joffri lill-kandidati li jirnexxu opportunità li jtejbu l-ħiliet tagħhom kif ukoll esperjenza ta’ xogħol f’ambjent multikulturali internazzjonali.

Dan il-programm, iffinanzjat mill-Fond Fiduċjarju tal-FEMIP, ifittex kandidati li jispeċjalizzaw f’qasam rilevanti għall-investiment internazzjonali u s-servizzi bankarji għall-iżvilupp, bħal:

• finanzi (b’mod partikolari l-finanzjament tal-proġetti, il-finanzjament tal-SMEs, l-analiżi tal-kreditu u tar-riskju)
• ekonomija (mikro/makroekonomija, żvilupp, statistika, analiżi tas-suq tax-xogħol)
• ambjent, inġinerija (portijiet, toroq, enerġija, eċċ.) jew ippjanar urban

Eliġibbiltà

Biex tkun eliġibbli, trid tkun:

• student fl-aħħar sena ta’ kors f’istitut ta’ edukazzjoni għolja, jew gradwat reċenti, b’inqas minn sentejn esperjenza rilevanti,
• ċittadin tal-Pajjiżi Sħab Mediterranji (l-Alġerija, l-Eġittu, il-Palestina*, Iżrael, il-Ġordan, il-Libanu, il-Marokk u t-Tuneżija).

Ġeneralment, il-kandidati li jirnexxu se jkunu rreġistraw fi programm ta’ studju gradwat u qed isegwu lawrja ta’ Masters u diġà jkollhom xi esperjenza ta’ xogħol.

Barra minn hekk, trid tissodisfa l-kriterji li ġejjin:

• turi ħila fi twettiq ta’ xogħol analitiku, eżerċitar ta’ ġudizzju tajjeb u ħidma bħala parti minn tim
• profiċjenza fl-Ingliż u/jew fil-Franċiż; l-għarfien tal-lingwi tal-FEMIP ikun ta’ vantaġġ
• xi esperjenza ta’ xogħol tkun ta’ vantaġġ (normalment mhux aktar minn sentejn)

Se tkun responsabbli għall-akkomodazzjoni tiegħek stess, iżda se titħallas allowance ta’ kull xahar b’rata fissa biex tgħin fl-ispejjeż tal-għajxien u se tingħata rimborż tal-ispejjeż tal-ivvjaġġar (vjaġġ bir-ritorn wieħed mill-punt ta’ oriġini tiegħek).

Programm ta’ Traineeship tas-Sħubija tal-Lvant iffinanzjat mill-Fond Fiduċjarju għall-Assistenza Teknika tas-Sħubija tal-Lvant

Programm multiannwali li l-għan tiegħu hu li joffri lill-kandidati li jirnexxu opportunità li jtejbu l-ħiliet tagħhom kif ukoll esperjenza ta’ xogħol f’ambjent multikulturali internazzjonali.

Il-programm, iffinanzjat mill-Fond Fiduċjarju għall-Assistenza Teknika tas-Sħubija tal-Lvant, ifittex kandidati li jispeċjalizzaw f’qasam rilevanti għall-banek internazzjonali tal-investiment u l-iżvilupp, bħall-finanzjament (b’mod partikolari l-finanzjament tal-proġetti, il-finanzjament tal-SMEs, l-analiżi tal-kreditu u tar-riskju) jew l-ekonomija (il-mikroekonomija, l-iżvilupp, l-istatistika, l-analiżi tas-suq tax-xogħol) kif ukoll l-ambjent, l-inġinerija (portijiet, toroq, enerġija, eċċ.) jew l-ippjanar urban.

Eliġibbiltà

Biex tkun eliġibbli, trid tkun:

• ċittadin tal-Pajjiżi tas-Sħubija tal-Lvant (l-Ażerbajġan, l-Armenja, il-Belarussja, il-Georgia, il-Moldova u l-Ukrajna),
• gradwat jew fl-aħħar sena ta’ kors f’istitut ta’ edukazzjoni għolja.

Ġeneralment, il-kandidati li jirnexxu se jkunu rreġistraw fi programm ta’ studju gradwat (qed isegwu lawrja ta’ Masters) u diġà jkollhom xi esperjenza ta’ xogħol.

Barra minn hekk, trid tissodisfa l-kriterji li ġejjin:

• profiċjenza fl-Ingliż u/jew fil-Franċiż (l-għarfien ta’ lingwi oħra tal-Ewropa tal-Lvant ikun ta’ vantaġġ);
• turi ħila fi twettiq ta’ xogħol analitiku, eżerċitar ta’ ġudizzju tajjeb u ħidma bħala parti minn tim;
• xi esperjenza ta’ xogħol tkun ta’ vantaġġ (normalment mhux aktar minn sentejn);
• ebda esperjenza professjonali preċedenti jew taħriġ intern għal aktar minn sitt ġimgħat ma’ istituzzjonijiet, aġenziji jew korpi oħra tal-UE.

Il-Bank Ewropew tal-Investiment jipprovdi pakkett ta’ remunerazzjoni kompetittiv lit-trainees kollha, inkluż stipendju ta’ kull xahar, assigurazzjoni u rimborż tal-ispejjeż tal-ivvjaġġar (vjaġġ wieħed bir-ritorn minn/sal-punt ta’ oriġini/residenza għal traineeship ta’ sa 6 xhur jew tnejn fil-każ ta’ inkarigi ta’ bejn 10 xhur u 12-il xahar). It-trainees se jkunu responsabbli għall-ispejjeż tal-għajxien/tal-akkomodazzjoni tagħhom stess.

Kull kandidat magħżul irid jimpenja ruħu għal minimu ta’ 6 xhur u massimu ta’ 12-il xahar fil-Programm, li għandhom isiru fil-kwartieri ġenerali tal-Bank Ewropew tal-Investiment fil-Lussemburgu jew f’wieħed mill-uffiċċji esterni. Fil-każ tal-aħħar, il-kandidati jistgħu japplikaw biss għal pożizzjoni f’pajjiż li mhumiex residenti/ċittadini tiegħu.

 

Internships u impjiegi fis-sajf

Il-Bank Ewropew tal-Investiment joffri opportunitajiet għall-istudenti fil-forma ta’ impjiegi tas-sajf għal żmien qasir (minn ġimagħtejn sa erba’ ġimgħat) u internships fit-tul, li normalment idumu bejn tliet xhur u 12-il xahar, skont il-programm.

Eliġibbiltà

Biex tkun eliġibbli, trid jew tkun:

• fl-aħħar sena tiegħek fl-università,

jew

• gradwat b’inqas minn sena esperjenza ta’ xogħol (mill-aħħar lawrja, esklużi l-internships),

u

• ċittadin tal-Istati Membri tal-UE u l-Pajjiżi Kandidati li n-negozjati ta’ sħubija tagħhom bdew (bħalissa: It-Turkija, is-Serbja u l-Montenegro),
• profiċjenti fl-Ingliż u/jew fil-Franċiż (l-għarfien ta’ lingwi oħra tal-UE se jkun ta’ vantaġġ).

Barra minn hekk, trid tissodisfa l-kriterji li ġejjin:

• turi ħila fi twettiq ta’ xogħol analitiku, eżerċitar ta’ ġudizzju tajjeb u ħidma bħala parti minn tim

Ġeneralment, il-kandidati li jirnexxu se jkunu rreġistraw fi programm ta’ studju gradwat (qed isegwu lawrja ta’ Masters).

Dati ta’ ammissjoni

L-1 ta’ Frar u l-1 ta’ Settembru. Dawn tipikament jitħabbru bejn wieħed u ieħor erba’ xhur qabel kull dħul. 

L-internships normalment idumu bejn tlieta u ħames xhur (sitt xhur jekk jintalbu mill-universitajiet), u ma jistgħux jiġu estiżi lil hinn mill-perjodu massimu. Il-biċċa l-kbira huma bbażati fil-kwartieri ġenerali tal-Bank Ewropew tal-Investiment fil-Lussemburgu.

Se tkun responsabbli għall-akkomodazzjoni tiegħek stess, iżda se titħallas allowance ta’ kull xahar b’rata fissa biex tgħin fl-ispejjeż tal-għajxien u se tingħata rimborż tal-ispejjeż tal-ivvjaġġar (vjaġġ bir-ritorn wieħed mill-punt ta’ oriġini tiegħek).

 

Għal aktar informazzjoni jekk jogħġbok żur it-taqsima work with us fuq is-sit web tal-Bank Ewropew tal-Investiment.