Amministraturi fil-qasam tat-tassazzjoni

Għandek esperjenza fit-tassazzjoni diretta jew indiretta? Tixtieq tibda karriera internazzjonali fi ħdan tim multikulturali u varjat? Jekk iva, kompli aqra.

L-istituzzjonijiet tal-UE qed ifittxu professjonisti f’żewġ oqsma differenti: it-tassazzjoni diretta u t-tassazzjoni indiretta, inkluża l-liġi tat-taxxa. Il-kandidati li jirnexxu se jiġu reklutati bħala amministraturi, il-grad AD 6.

Il-kompiti ewlenin tiegħek ivarjaw skont il-qasam magħżul. Innota li tista’ tapplika biss għal wieħed minn dawn l-oqsma:

Qasam 1 – It-tassazzjoni diretta, inkluża l-liġi tat-taxxa

Il-kompiti ewlenin tiegħek jistgħu jinkludu wieħed jew aktar minn dawn li ġejjin: l-iżvilupp, l-implimentazzjoni u l-evalwazzjoni tal-politiki u tal-leġiżlazzjoni fil-qasam tat-tassazzjoni diretta; il-valutazzjoni tal-leġiżlazzjoni tat-taxxa fl-Istati Membri tal-UE u f’pajjiżi terzi (jiġifieri, pajjiżi mhux fl-UE); l-eżami tal-inkjesti, tal-ilmenti u tal-petizzjonijiet dwar kwistjonijiet ta’ tassazzjoni diretta; it-tħejjija ta’ opinjonijiet u ta’ dokumenti legali għal proċeduri tal-qorti u ta’ arbitraġġ; il-ġestjoni ta’ proċeduri ta’ ksur; l-infurzar tar-regoli dwar l-għajnuna mill-Istat; l-iffaċilitar tal-proposti leġiżlattivi, l-iskambju ta’ informazzjoni, u l-koordinazzjoni tal-għodod tal-IT mal-Istati Membri; ir-rappreżentanza u n-negozjar internazzjonali dwar kwistjonijiet ta’ tassazzjoni diretta; it-twettiq ta’ analiżijiet politiċi, dwar il-politiki, legali jew xjentifiċi; il-ġestjoni tal-baġits u tal-proġetti relatati mat-tassazzjoni diretta.

Qasam 2 - It-tassazzjoni indiretta, inkluża l-liġi tat-taxxa

Il-kompiti ewlenin tiegħek jistgħu jinkludu wieħed jew aktar minn dawn li ġejjin: l-iżvilupp, l-implimentazzjoni, l-applikazzjoni u l-evalwazzjoni tal-politiki u tal-leġiżlazzjoni fil-qasam tat-tassazzjoni indiretta; l-infurzar tar-regoli dwar l-għajnuna mill-Istat fil-qasam tat-tassazzjoni indiretta; l-eżami tal-inkjesti, tal-ilmenti u tal-petizzjonijiet relatati mat-tassazzjoni indiretta; it-tħejjija ta’ opinjonijiet legali u l-ġestjoni ta’ proċeduri ta’ ksur; l-ippjanar, it-twettiq u s-segwitu tal-ispezzjonijiet tal-VAT fl-Istati Membri u l-kompiti relatati; il-koordinazzjoni, in-negozjar u r-rappreżentanza tal-interessi fil-livell internazzjonali; it-twettiq ta’ analiżi politika, legali u xjentifika, l-għoti ta’ pariri, u t-tisrif tal-għarfien tekniku f’miżuri rilevanti; il-ġestjoni ta’ aspetti baġitarji, finanzjarji u tal-kontabilità, u s-sorveljanza ta’ proġetti fil-qasam tat-tassazzjoni indiretta.

L-informazzjoni ddettaljata dwar id-dmirijiet speċifiċi li l-kandidati magħżulin jistgħu jistennew li jwettqu hija inkluża fl-Avviż tal-Kompetizzjoni (ara l-Anness II – Dmirijiet tipiċi).

Għandek dak li hu meħtieġ?

Biex tapplika, trid tissodisfa r-rekwiżiti li ġejjin:

Tkun ċittadin tal-UE u tgawdi d-drittijiet kollha ta’ ċittadin tal-UE.
Ikollok għarfien komplut ta’ waħda mil-lingwi uffiċjali tal-UE u għarfien sodisfaċenti ta’ lingwa uffiċjali differenti tal-UE.

Irid ikollok ukoll:

lawrja universitarja ta’ mill-inqas 3 snin f’wieħed jew aktar mill-oqsma li ġejjin: fit-tassazzjoni nazzjonali jew internazzjonali; fil-liġi; fl-ekonomija; fil-finanzi; fl-immaniġġjar jew fl-amministrazzjoni tan-negozju; fl-accounting, segwit b’minn tal-anqas 4 snin ta’ esperjenza professjonali rilevanti.
*Ir-rekwiżit tal-edukazzjoni jitqies li ġie ssodisfat jekk il-kandidati jkollhom lawrja universitarja f’qasam differenti, iżda jkunu temmu kors akkademiku ta’ sena u jkunu kisbu diploma f’wieħed mill-oqsma speċifikati hawn fuq, diment li l-istudji inkwistjoni jitqiesu ekwivalenti għal studji universitarji ta’ mill-inqas tliet snin (pereż. il-korsijiet ta’ konverżjoni).

jew

lawrja universitarja ta’ mill-anqas 4 snin f’wieħed mill-oqsma elenkati hawn fuq, segwita minn mill-anqas 3 snin ta’ esperjenza professjonali rilevanti.
*Ir-rekwiżit tal-edukazzjoni jitqies issodisfat jekk il-kandidat ikollu lawrja avvanzata (masters, PhD, jew ekwivalenti) f’wieħed mill-oqsma speċifikati hawn fuq, irrispettivament mill-qasam tal-istudji preċedenti kompluti mill-kandidat.

jew

lawrja universitarja ta’ mill-anqas 3 snin f’qasam ieħor minbarra dawk elenkati hawn fuq, segwita b’mill-inqas 6 snin esperjenza professjonali rilevanti.

24 lingwa uffiċjali tal-UE għall-ittestjar

Il-kandidati jistgħu jagħżlu b’mod liberu kwalunkwe tnejn mill-24 lingwa uffiċjali tal-UE għall-ittestjar.

Ladarba jkunu fuq lista ta’ riżerva, il-kandidati li jgħaddu jistgħu jiġu kkuntattjati mis-servizzi ta’ reklutaġġ tal-istituzzjonijiet u l-korpi tal-UE interessati fil-profil tagħhom, għal intervisti ta’ reklutaġġ immirati. Tali intervisti, u kwalunkwe proċedura relatata oħra, huma barra mill-proċess ta’ selezzjoni mwettaq mill-EPSO. L-intervisti ta’ reklutaġġ jitwettqu mis-servizzi ta’ reklutaġġ rilevanti normalment bl-Ingliż u/jew bil-Franċiż. Lingwi oħrajn jistgħu jintużaw ukoll matul l-intervisti, abbażi tal-ħtiġijiet tas-servizzi li jkunu qed jirreklutaw u l-għarfien espress mill-kandidati fl-applikazzjonijiet tagħhom.

Diversità u Inklużjoni

Bħala impjegaturi, l-istituzzjonijiet u l-korpi tal-UE joffru komunità ta’ għarfien espert b’firxa wiesgħa ta’ opportunitajiet biex twessa’ l-iżvilupp personali u professjonali tiegħek. It-timijiet multikulturali, internazzjonali u diversi li jiffurmaw is-Servizz Ċivili tal-UE jaħdmu flimkien biex minn dan jibbenefikaw madwar 450 miljun ċittadin tal-UE, u oħrajn lil hinn minnha.

L-istituzzjonijiet u l-korpi tal-UE li l-EPSO jaħdem għalihom, huma impenjati favur id-diversità u l-inklużjoni. Huma jfittxu d-diversità b’mod attiv u jippromwovu l-inklużjoni fost l-istaff tagħhom. Għalhekk, l-EPSO jinkoraġġixxi applikazzjonijiet minn kandidati kwalifikati minn sfondi differenti u fuq l-aktar bażi ġeografika wiesgħa possibbli fost l-Istati Membri tal-UE. Tgħallem aktar dwar id-Diversità u l-Inklużjoni fl-istituzzjonijiet u l-korpi tal-UE f’din il-paġna web iddedikata.

Għal informazzjoni ddettaljata dwar ir-rekwiżiti, jekk jogħġbok aqra l-Avviż tal-Kompetizzjoni fil-paġni tal-applikazzjoni tagħna hawn taħt.

Il-perjodu għall-applikazzjoni issa huwa miftuħ u jagħlaq fid-19 ta’ Frar 2025, f’12.00 (nofsinhar), ħin ta’ Brussell.

Ibda - It-tassazzjoni diretta, inkluża l-liġi tat-taxxa

Ibda - It-tassazzjoni indiretta, inkluża l-liġi tat-taxxa