Maurizio huwa uffiċjal tal-istampa fil-Parlament Ewropew fl-Italja. Huwa agħma u ilu jaħdem fl-istituzzjonijiet tal-UE mill-2015.
Staqsejnieh kif sab il-proċedura ta’ selezzjoni u jekk ħassux integrat fit-tim tiegħu.

"It-Tim tal-Aċċessibbiltà tal-EPSO kien tassew mill-aqwa! Kollox mexa ħarir matul il-kompetizzjoni. Kelli t-test bil-Braille u assistent personali; kelli wkoll test f’verżjoni elettronika. Għal dak li hu relatat mal-proċedura ta’ selezzjoni proprja ta’ impjieg, kelli biss intervista u allura ma kelli l-ebda bżonn ta’ akkomodazzjoni. Ma nħoss ebda ostaklu. Qatt ma kelli problemi għax kont diżabbli. Jekk ikollok attitudni pożittiva, anki jekk in-nies ma jafux jew huma xettiċi, jekk inti ħerqan li taqsam l-esperjenza tiegħek, tista’ tkisser il-ħitan.”

Maurizio jagħti parir lil kandidati oħra bi bżonnijiet speċjali biex japplikaw għal Karriera mal-UE.

Ngħidilhom, li dan hu assolutament possibbli, jista’ jsir, u m’hemmx għalfejn tkunu poliglota jew supereroj! Dan huwa xi ħaġa fattibbli ħafna. Jieħu tant ftit minn ħinek, li m’għandek xejn x’titlef, u tista’ tirbaħ karriera tassew interessanti. Għall-prezz li tħallas imqabbel mal-benefiċċji żgur li jaqbillek. L-unika ħaġa iebsa hi l-applikazzjoni… Iżda ladarba tagħmilha, tieħu tassew ftit tal-ħin u potenzjalment opportunità enormi! Taqtgħux qalbkom mill-applikazzjoni!”

Krystle taħdem bħala assistenta tal-komunikazzjonijiet fil-Kummissjoni Ewropea fi Brussell, hi għandha mobbiltà mnaqqsa u ilha taħdem għall-istituzzjoni Ewropea mill-2002.
Staqsejnieha x’tip ta’ arranġamenti speċjali ġew ipprovduti lilha u jekk tħossx li d-diżabbiltà tagħha kinitx ta’ ostaklu għal xogħolha.

“Il-Kummissjoni pprovdietli wheelchair, footrest, siġġu mediku u spazju riżervat għall-parking. Tpoġġew support bars fil-kamra tal-ħasil. Inħossni totalment integrata fit-tim tiegħi. Meta jkollna laqgħa, il-kollegi jiġu b’mod spontanju joffru l-għajnuna tagħhom biex iwassluni jew jitolbuni x’jistgħu jagħmlu. Hu pjaċir għalija li nħossni apprezzata u rikonoxxuta għal xogħli. M’għandi ebda trattament speċjali, naħdem bħal ħaddieħor, b’attitudni benevolenti f’dak li għandu x’jaqsam mal-mobbiltà.”

Krystle tagħti wkoll il-parir tagħha lil kandidati oħrajn bi bżonnijiet speċjali li japplikaw għal Karriera mal-UE.

“Nirrakkomanda ħafna li wieħed japplika! Ebda żvantaġġ fiżiku mhu ostakolu, il-kompetizzjonijiet huma bbażati fuq l-għarfien, mhux fuq maratona. Kulħadd hu aċċettat, ċittadinanza, kulur, ġeneru, diżabbiltà fiżika, ... xejn mhu ostaklu. Huma rappreżentati n-nazzjonalitajiet kollha tal-UE mill-orizzonti kollha, id-differenza hi pożittiva. Mhux importanti jekk intix persuna b’mobbiltà mnaqqsa Maltija jew Estonjana b’vista batuta. Multikulturali jfisser ħidma ma’ oħrajn, mingħajr ma jsiru distinzjonijiet. L-istituzzjonijiet stabbilixxew servizzi li jilqgħu t-tipi kollha ta’ nies, l-opportunitajiet indaqs huma dritt reali.”

Jien responsabbli mill-koordinazzjoni tal-organizzazzjoni tal-Avveniment Ewropew taż-Żgħażagħ (EYE). L-EYE jiġbor flimkien eluf ta’ żgħażagħ fil-Parlament Ewropew fi Strasburgu biex isawru u jaqsmu l-ideat tagħhom dwar il-futur tal-Ewropa.

Verament kuntenta nagħmel dan ix-xogħol: il-kompiti tiegħi ta’ kuljum huma pjuttost varjati u nħoss sodisfazzjoni kbir li naħdem ma’ u għaż-żgħażagħ mill-Unjoni Ewropea u lil hinn minnha.

Fir-rwol tiegħi, nikkoordina t-timijiet differenti responsabbli għall-programm, il-komunikazzjoni esterna u l-loġistika tal-avveniment. Nikkollabora wkoll mal-partijiet esterni differenti involuti f’avveniment fuq skala kbira bħal dan biex niżgura li kollox jitwettaq mingħajr xkiel.

Għandi sfond fil-komunikazzjoni u l-lingwi. Wara l-lawrja tiegħi ta’ Baċellerat fl-Istudji tal-Komunikazzjoni f’Lisbona, il-belt tiegħi, ġibt Masters fl-Industriji Kulturali u Kreattivi fil-King's College f’Londra.

Wara varjetà ta’ esperjenzi ta’ xogħol - l-aktar bħala freelancer u fis-settur privat - ingħaqadt mal-Parlament Ewropew fl-2013. Bdejt naħdem bħala traduttur fil-Lussemburgu, imbagħad mort Brussell biex naħdem fil-komunikazzjoni interna fil-qasam tal-IT, qabel ma ħadt il-pożizzjoni attwali tiegħi fil-komunikazzjoni u l-avvenimenti fid-Direttorat Ġenerali għall-Komunikazzjoni tal-Parlament Ewropew.

Ingħaqadt mad-dipartiment tal-Kummissjoni Ewropea għall-Istabbiltà Finanzjarja, is-Servizzi Finanzjarji u l-Unjoni tas-Swieq Kapitali (DĠ FISMA), l-istabbiltà finanzjarja u s-servizzi finanzjarji fl-2019. L-ewwel ħdimt fuq il-politiki ta’ finanzi diġitali u sostenibbli qabel ma ngħaqadt mat-tim tal-istampa. Aħna nippromwovu l-politiki tagħna lill-istampa, lill-partijiet ikkonċernati u lill-pubbliku ġenerali f’kooperazzjoni mill-qrib mal-unitajiet tal-politika, is-servizz tal-Kelliem u l-Kabinett tal-Kummissarju.

Id-dmirijiet tiegħi huma li nfassal, nippjana u nwettaq attivitajiet ta’ komunikazzjoni dwar il-bejgħ bl-imnut u l-finanzi diġitali, bħal stqarrijiet għall-istampa, avvenimenti u kampanji, punti ta’ taħdit, reviżjonijiet tal-istampa, jew kontenut għall-bullettin tagħna ta’ kull xahar u l-media soċjali. Jien responsabbli wkoll mill-koordinazzjoni tal-istħarriġ tal-Ewrobarometru, jiġifieri stħarriġ ta’ opinjoni immirat lejn iċ-ċittadini tal-UE, dwar is-servizzi finanzjarji għad-dipartiment. Fl-aħħar nett, jien il-korrispondent tal-komunikazzjoni interna tad-DĠ FISMA: Nippromwovi l-involviment tal-istaff billi ngħaddi aħbarijiet importanti, norganizza laqgħat mal-istaff kollu, u nimmaniġġja “FISMA TV” tagħna stess!

Għandi sfond fil-politika pubblika, il-liġi u l-ekonomija u għandi Masters fl-Affarijiet Ewropej. Qabel, ksibt esperjenza dwar kwistjonijiet politiċi u ekonomiċi Ewropej fis-servizz ċivili Franċiż u s-Senat, ir-rappreżentanza tal-Kummissjoni fir-Renju Unit, id-dipartiment tal-kompetizzjoni tal-Kummissjoni, u f’konsulenza dwar l-affarijiet pubbliċi.

Ingħaqadt mal-Kummissjoni Ewropea fl-2002 u bħalissa qed naħdem fid-Direttorat Ġenerali għall-Edukazzjoni, iż-Żgħażagħ, l-Isport u l-Kultura (DĠ EAC) tal-Kummissjoni Ewropea. Jien Manager tal-Programmi għall-Erasmus+ u parti mit-tim tas-“Sena Ewropea taż-Żgħażagħ 2022”.

Jien kburi li nedejt proġett inkredibbli msejjaħ DiscoverEU li jagħti ċans liż-żgħażagħ ta’ 18-il sena jirbħu pass tal-ivvjaġġar mingħajr ħlas. Il-fatt li xogħli għandu impatt fuq iż-żgħażagħ Ewropej huwa xi ħaġa li ttini ħafna sodisfazzjon. Inqatta’ l-ġurnata tiegħi nikkollabora mal-organizzazzjonijiet taż-żgħażagħ u ma’ żgħażagħ mill-Ewropa kollha, bl-użu tal-media soċjali, inxerred l-informazzjoni u nibni komunità ta’ vjaġġaturi tad-DiscoverEU.

Lestejt l-istudji tiegħi fil-Marketing u l-karriera tiegħi kienet fir-reklamar. Dejjem kont attirat minn ambjent internazzjonali u multikulturali; u huwa għalhekk li l-Kummissjoni Ewropea kienet għażla naturali għalija.