Ħafna minna jużaw kompjuters korporattivi għal kompiti mhux relatati max-xogħol.

Għal dik ir-raġuni, ħafna kandidati għall-kompetizzjonijiet tal-EPSO jistgħu jistennew li jkunu jistgħu jużaw il-kompjuters korporattivi tagħhom biex jagħmlu t-testijiet ta’ selezzjoni online tal-EPSO. Madankollu, ħafna drabi dan ma jkunx il-każ. 

Dawn it-testijiet jeħtieġu li parti terza – kuntrattur estern – tieħu l-kontroll tal-kompjuter tiegħek waqt li tkun qed tagħmel it-test. Fost affarijiet oħrajn, dan jimpedixxi lill-kandidati milli jibbrawżjaw l-internet jew milli jkollhom applikazzjonijiet miftuħin li jkunu barra mill-mandat tat-testijiet.

Fl-ambjent diġitali tal-klijenti istituzzjonali tal-EPSO (jiġifieri l-istituzzjonijiet tal-UE li jservi l-EPSO), kif ukoll ta’ partijiet ikkonċernati korporattivi oħrajn, hemm diversi saffi ta’ sigurtà tal-IT applikati għal kompjuters korporattivi, inklużi laptops.

Sabiex it-testijiet ta’ selezzjoni online jkunu jistgħu jsiru fuq kompjuter korporattiv, il-kontrolli multipli tas-sigurtà jkollhom jiġu diżattivati, illaxkati jew mibdulin minn amministratur awtorizzat. Dan japplika wkoll għall-kompjuters li jsiru disponibbli għall-persunal tal-klijenti istituzzjonali tal-EPSO (eż. il-Kummissjoni Ewropea, il-Parlament Ewropew, il-Kunsill tal-UE u oħrajn).

Naturalment, il-klijenti istituzzjonali tal-EPSO, inklużi partijiet ikkonċernati korporattivi oħrajn, iridu jiżguraw li r-riskji għall-ambjent diġitali tagħhom jitnaqqsu kemm jista’ jkun. 

Biex issir taf aktar dwar ir-restrizzjonijiet tas-sigurtà involuti, aqra din il-paġna ta’ informazzjoni dettaljata tal-EPSO.