Assistenti fil-qasam tal-finanzi

Għandek esperjenza fil-qasam tal-finanzi? Tixtieq tibda karriera internazzjonali fi ħdan tim multikulturali u varjat? Jekk iva, kompli aqra.

L-UE qed tfittex professjonisti fl-oqsma tal-ġestjoni finanzjarja, il-kontabbiltà u t-teżor u l-akkwist pubbliku. Il-kandidati magħżulin se jiġu reklutati fil-grad ta’ assistent AST 3.

Aħna qed noffru opportunitajiet lill-kandidati li jaqblu ma’ wieħed mill-profili ta’ hawn taħt. Innota li tista’ tapplika biss għal qasam wieħed.

Qasam 1 - Ġestjoni finanzjarja: Il-kompiti ewlenin tiegħek se jinkludu l-assistenza: fit-tħejjija, l-eżekuzzjoni u l-monitoraġġ tal-baġit annwali; fil-ħolqien ta’ dossiers finanzjarji; fil-monitoraġġ ta’ kuntratti, ftehimiet ta’ għotja, u ftehimiet dwar il-livell ta’ servizz; fl-iżgurar ta’ ġestjoni finanzjarja tajba; fl-implimentazzjoni ta’ pjanijiet ta’ azzjoni/rakkomandazzjonijiet tal-awditjar; fl-għoti ta’ pariri lill-unitajiet operazzjonali fil-ġestjoni tal-operazzjonijiet baġitarji u finanzjarji; fit-tfassil ta’ rapporti/statistika finanzjarja.
Qasam 2 - Kontabbiltà u teżor: Il-kompiti ewlenin tiegħek se jinkludu l-assistenza: fil-verifika tad-data ewlenija tal-entitajiet legali u tal-kontijiet bankarji; fil-ġestjoni tal-fatturi; fl-eżekuzzjoni u l-monitoraġġ ta’ pagamenti awtorizzati; fl-irkupru ta’ ammonti riċevibbli u fl-entrati kontabilistiċi relatati; fil-ġestjoni tal-assi, id-deprezzament u l-inventarji; fl-irkuprar tal-VAT; fit-twettiq ta’ kontrolli finanzjarji u kontabilistiċi regolari; fil-ġestjoni tat-teżor; fl-abbozzar ta’ rapporti; fl-għoti ta’ taħriġ u fl-appoġġ fi kwistjonijiet ta’ kontabbiltà.
Qasam 3 - Akkwist pubbliku: Il-kompiti ewlenin tiegħek se jinkludu l-assistenza: fl-ipprogrammar u l-implimentazzjoni ta’ proċeduri ta’ akkwist pubbliku; fl-abbozzar ta’ tweġibiet, talbiet għal informazzjoni/kjarifika, ittri dwar il-proċeduri tal-offerti; fl-assistenza fil-monitoraġġ legali u finanzjarju tal-kuntratti; fit-tfassil, l-iżvilupp u ż-żamma ta’ sistemi tal-akkwist elettroniku; fl-għoti ta’ taħriġ u appoġġ lis-servizzi operazzjonali rigward ir-regoli tal-akkwist pubbliku u l-aħjar prattiki.

L-informazzjoni dettaljata dwar id-dmirijiet speċifiċi li l-kandidati magħżulin jistgħu jistennew li jwettqu hi inkluża fl-Avviż tal-Kompetizzjoni (ara l-Anness II - Dmirijiet tipiċi).

Diversità u Inklużjoni

Bħala impjegaturi, l-istituzzjonijiet u l-korpi tal-UE joffru komunità ta’ għarfien espert b’firxa wiesgħa ta’ opportunitajiet biex twessa’ l-iżvilupp personali u professjonali tiegħek. It-timijiet multikulturali, internazzjonali u diversi li jiffurmaw is-Servizz Ċivili tal-UE jaħdmu flimkien biex minn dan jibbenefikaw madwar 450 miljun ċittadin tal-UE, u oħrajn lil hinn minnha.

L-istituzzjonijiet u l-korpi tal-UE li l-EPSO jaħdem għalihom, huma impenjati favur id-diversità u l-inklużjoni. Huma jfittxu d-diversità b’mod attiv u jippromwovu l-inklużjoni fost l-istaff tagħhom. Għalhekk, l-EPSO jinkoraġġixxi applikazzjonijiet minn kandidati kwalifikati minn sfondi differenti u fuq l-aktar bażi ġeografika wiesgħa possibbli fost l-Istati Membri tal-UE. Tgħallem aktar dwar id-Diversità u l-Inklużjoni fl-istituzzjonijiet u l-korpi tal-UE f’din il-paġna web iddedikata.

Għandek dak li hu meħtieġ?

Biex tapplika, trid tkun ċittadin tal-UE u tgawdi d-drittijiet kollha ta’ ċittadin tal-UE.

Irid ikollok għarfien komplut ta’ waħda mil-lingwi uffiċjali tal-UE u għarfien sodisfaċenti ta’ lingwa uffiċjali differenti tal-UE.

Irid ikollok ukoll:

livell ta’ edukazzjoni postsekondarja ta’ mill-anqas sentejn iċċertifikat b’diploma segwit minn mill-anqas tliet snin ta’ esperjenza professjonali rilevanti. Id-diploma tista’ tkun fl-oqsma li ġejjin:
- Għall-qasam 1: l-ekonomija, l-amministrazzjoni pubblika, l-amministrazzjoni tan-negozju, il-kontabilità, il-finanzi/il-ġestjoni finanzjarja, jew il-liġi
- Għall-qasam 2: il-kontabbiltà jew il-finanzi/ġestjoni finanzjarja
- Għall-qasam 3: l-ekonomija, l-amministrazzjoni pubblika, l-amministrazzjoni tan-negozju, il-kontabilità, il-finanzi/il-ġestjoni finanzjarja, jew il-liġi

jew

livell ta’ edukazzjoni sekondarja ċċertifikat b’diploma li jagħti aċċess għal edukazzjoni postsekondarja, segwit minn mill-anqas sitt snin ta’ esperjenza professjonali rilevanti.

24 lingwa uffiċjali tal-UE għall-ittestjar

Il-kandidati jistgħu jagħżlu b’mod liberu kwalunkwe tnejn mill-24 lingwa uffiċjali tal-UE għall-ittestjar.

Ladarba jkunu fuq lista ta’ riżerva, il-kandidati li jgħaddu jistgħu jiġu kkuntattjati mis-servizzi ta’ reklutaġġ tal-istituzzjonijiet u l-korpi tal-UE interessati fil-profil tagħhom, għal intervisti ta’ reklutaġġ immirati. Tali intervisti, u kwalunkwe proċedura relatata oħra, huma barra mill-proċess ta’ selezzjoni mwettaq mill-EPSO. L-intervisti ta’ reklutaġġ jitwettqu mis-servizzi ta’ reklutaġġ rilevanti normalment bl-Ingliż u/jew bil-Franċiż. Lingwi oħrajn jistgħu jintużaw ukoll matul l-intervisti, abbażi tal-ħtiġijiet tas-servizzi li jkunu qed jirreklutaw u l-għarfien espress mill-kandidati fl-applikazzjonijiet tagħhom.

Għal informazzjoni ddettaljata dwar ir-rekwiżiti, jekk jogħġbok aqra l-Avviż tal-Kompetizzjoni fil-paġna tal-applikazzjoni tagħna hawn taħt.

Il-perjodu għall-applikazzjonijiet jiftaħ fil-25 ta’ Lulju 2024 u jintemm fit-3 ta’ Settembru 2024, f’12.00 (nofsinhar), ħin ta’ Brussell.

Ibda - Assistenti - Ġestjoni finanzjarja

Ibda - Assistenti - Kontabilità u teżor

Ibda - Assistenti - Akkwist pubbliku