Mill-2024, bil-bidla tal-EPSO lejn reġim sħiħ ta’ 24 lingwa, tip ġdid ta’ test se jiġi introdott mill-EPSO fil-proċeduri ta’ selezzjoni tiegħu: it-test bil-miktub, li għandu l-għan li jivvaluta l-ħiliet tal-komunikazzjoni bil-miktub tal-kandidati. It-test bil-miktub se jissostitwixxi l-istudju tal-każ*.
It-terminu “test bil-miktub” jinkludi tliet tipi differenti ta’ testijiet li l-EPSO se juża skont il-ħtiġijiet espressi mis-servizzi ta’ reklutaġġ għal kull kompetizzjoni:
- Test bil-miktub (WT) relatat mal-qasam/oqsma tal-kompetizzjoni, li jivvaluta biss il-ħiliet tal-komunikazzjoni bil-miktub.
- Test bil-miktub relatat mal-qasam (FRWT), li jivvaluta l-ħiliet tal-komunikazzjoni bil-miktub u l-għarfien fil-qasam rilevanti tal-kompetizzjoni.
- Essay b’test liberu dwar kwistjonijiet tal-UE (EUFTE), li tivvaluta biss il-ħiliet tal-komunikazzjoni bil-miktub.
Il-kandidati se jkunu meħtieġa jwieġbu għall-kompiti tat-test abbażi tad-dokumentazzjoni pprovduta mill-EPSO relatata mal-qasam/oqsma tal-kompetizzjoni, kif speċifikat fl-avviż tal-kompetizzjoni.
It-test bil-miktub mhux test tal-lingwa. Il-kandidati se jiġu vvalutati abbażi tal-“ankri” speċifiċi elenkati hawn taħt (“ankri” huma l-elementi meqjusin minn dawk li jikkoreġu t-test (jiġifieri l-assessuri) meta jivvalutaw kompetenza partikolari).
“Ankri” għall-ħiliet tal-komunikazzjoni bil-miktub:
Il-kandidat:
- jagħti l-komunikazzjoni bil-miktub struttura bi fluss ta’ ideat loġiku.
- jikteb b’mod konċiż mingħajr l-użu ta’ kliem u sentenzi mhux meħtieġa.
- jippreżenta s-suġġett b’mod li jinftiehem.
- jadatta/ifassal il-kitba għall-udjenza u l-iskop maħsubin.
- juża l-informazzjoni pprovduta biex jittratta l-kompitu.
*L-istudji tal-każijiet se jkomplu jintużaw għal xi wħud mill-kompetizzjonijiet li għaddejjin.
