Kompetizzjonijiet tal-Parlament Ewropew għall-Amministraturi (AD6) ta’ nazzjonalità Awstrijaka u Olandiża
Il-Parlament Ewropew iddeċieda li jorganizza żewġ kompetizzjonijiet miftuħin (fil-grad AD6) biex ikollu lista ta’ kandidati xierqa minn fejn ikun jista’ jirrekluta ċittadini tar-Repubblika tal-Awstrija u tar-Renju tan-Netherlands.
L-għan ewlieni ta’ din il-kompetizzjoni speċifika għan-nazzjonalità hu li jitwessa’ l-għadd ta’ rekluti futuri possibbli u li jiġu rimedjati l-iżbilanċ u s-sottorappreżentanza sinifikanti eżistenti taċ-ċittadini Awstrijaki u Olandiżi fost l-uffiċjali tal-Parlament.
Il-profil imfittex hu ta’ amministratur għas-Segretarjat tal-Parlament Ewropew b’numru mmirat ta’ 30 kandidat xieraq ta’ nazzjonalità Awstrijaka u 90 kandidat xieraq ta’ nazzjonalità Olandiża.
Il-maġġoranza sinifikanti tal-pożizzjonijiet fil-Parlament Ewropew huma bbażati Brussell, il-Lussemburgu u Strasburgu (il-postijiet ta’ ħidma ewlenin tal-Parlament) skont il-ħtiġijiet tas-servizzi tal-Parlament. Id-dmirijiet jistgħu jinvolvu vvjaġġar bejn il-postijiet ta’ ħidma tal-Parlament.
Ir-reklutaġġ se jkun fil-grad AD6, l-ewwel skala, li s-salarju bażiku tiegħu hu ta’ €6,231,42 fix-xahar.
Il-Parlament Ewropew huwa impjegatur li joffri opportunitajiet ta’ xogħol indaqs u jilqa’ l-applikazzjonijiet mingħajr diskriminazzjoni abbażi tal-ġeneru, l-etniċità, il-kulur, l-oriġini etnika jew soċjali, il-fatturi ġenetiċi, il-lingwa, ir-reliġjon jew it-twemmin, l-opinjoni politika jew kwalunkwe opinjoni oħra, is-sħubija fi ħdan minorità nazzjonali, il-proprjetà, it-twelid, id-diżabbiltà, l-età jew l-orjentazzjoni sesswali, l-istat ċivili jew is-sitwazzjoni tal-familja.
L-amministraturi fis-Segretarjat tal-Parlament Ewropew jaħdmu f’firxa wiesgħa ta’ oqsma. Iwettqu dmirijiet ta’ management, ippjanar u riċerka li jistgħu jinkludu diversi attivitajiet, skont f’liema pożizzjoni tad-dipartiment tas-Segretarjat jiġi reklutat il-kandidat xieraq.
Kriterji tal-eliġibbiltà:
– int ċittadini tal-Awstrija/tan-Netherlands;
– tgawdi d-drittijiet kollha bħala ċittadin;
– wettaqt kull obbligu impost fuqek mil-liġijiet dwar is-servizz militari;
– tista’ tipproduċi r-referenzi adegwati dwar il-karattru tiegħek meħtieġa sabiex tiġi aċċertata l-idoneità tiegħek għat-twettiq tad-dmirijiet ikkonċernati.
Irid ikollok livell tal-edukazzjoni li jikkorrispondi għal studji universitarji sħaħ ta’ mill-inqas tliet snin, iċċertifikati b’diploma rikonoxxuta b’mod uffiċjali f’wieħed mill-Istati Membri tal-Unjoni Ewropea.
Irid ikollok mill-inqas sentejn esperjenza professjonali rilevanti għall-attivitajiet elenkati fid-deskrizzjoni tal-impjieg (jiġifieri fl-oqsma ta’ ħidma: l-għoti ta’ pariri u appoġġ lill-Membri tal-Parlament u l-korpi parlamentari, il-management tar-riżorsi, il-liġi, il-politika ta’ informazzjoni u komunikazzjoni, l-IT, is-sikurezza u s-sigurtà tal-IT, il-management tal-proġetti).
Irid ikollok għarfien komplut (minimu ta’ livell C1) tal-Ġermaniż (lingwa 1)/l-Olandiż(lingwa 1) , u għarfien sodisfaċenti (minimu ta’ livell B2) ta’ waħda mil-lingwi uffiċjali l-oħra tal-Unjoni Ewropea (lingwa 2): il-Bulgaru, il-Kroat, iċ-Ċek, id-Daniż, l-Olandiż, l-Ingliż, l-Estonjan, il-Finlandiż, il-Franċiż, il-Grieg, il-Ġermaniż, l-Ungeriż, l-Irlandiż, it-Taljan, il-Latvjan, il-Litwan, il-Malti, il-Pollakk, il-Portugiż, ir-Rumen, is-Slovakk, is-Sloven, l-Ispanjol jew l-Iżvediż.
Stadji tal-kompetizzjoni:
1. Preselezzjoni (test MCQ) u kontroll tal-eliġibbiltà
a) Preselezzjoni (test MCQ)
b) Kontroll tal-kriterji ta’ eliġibbiltà speċifiċi
2. Testijiet
a) Test tal-abbozzar
b) Intervista
Kif tapplika:
Trid tapplika permezz tal-pjattaforma Apply4EP.
Jekk jogħġbok aqra aktar fil-paġna ddedikata tas-sit web tal-Parlament Ewropew.
Skadenza għall-applikazzjonijiet: 12.00 (nofsinhar), ħin ta’ Brussell, fit-12 ta’ April 2024.
This competition is being organised under the full responsibility of the European Parliament.
EPSO is only involved in supporting its promotion via its different communication channels.
All queries regarding this competition should be addressed to the relevant services of the European Parliament.