L-istituzzjonijiet qed ifittxu kandidati b’talent, motivati u li jistgħu juru li għandhom dawn il-kompetenzi ġenerali li ġejjin:

• Analiżi u Soluzzjoni tal-Problemi: Jidentifikaw fatti kritiċi fi kwistjonijiet kumplessi u jiżviluppaw soluzzjonijiet kreattivi u prattiċi
• Komunikazzjoni: Jikkomunikaw b'mod ċar u preċiż kemm oralment kif ukoll bil-miktub
• Twassil ta’ Kwalità u Riżultati: Jieħdu responsabbiltà u inizjattiva personali biex jagħmlu xogħol ta' standard u kwalità għolja fi ħdan proċeduri speċifiċi
• Tagħlim u Żvilupp: Jiżviluppaw u jtejbu l-ħiliet personali u t-tagħrif dwar l-organizzazzjoni u l-ambjent tagħha
• Prijoritizzazzjoni u Organizzazzjoni: Jagħtu prijorità lill-iktar kompiti importanti, jaħdmu b’mod flessibbli u jorganizzaw xogħolhom b'mod effiċjenti
• Reżiljenza: Jibqgħu effiċjenti taħt pressjoni ta' xogħol għolja, jikkontrollaw b'mod pożittiv il-frustrazzjonijiet organizzattivi u jadattaw għal ambjent tax-xogħol li dejjem jinbidel
• Ħidma ma' Oħrajn: Jaħdmu f’kooperazzjoni mal-oħrajn f'timijiet u lil hinn mill-fruntieri organizzattivi u r-rispett tad-differenzi bejn il-persuni
• Tmexxija (għall-amministraturi biss): Jimmaniġġjaw, jiżviluppaw u jistimolaw lill-persuni biex jiksbu r-riżultati

Barra minn hekk, għall-profili aktar speċjalizzati, l-istituzzjonijiet qed ifittxu kandidati kkwalifikati ħafna fil-qasam tagħhom. Tista’ ssib l-informazzjoni dwar il-kompetenzi relatati mal-qasam, kif ukoll it-testijiet li jevalwaw kemm il-kompetenzi ġenerali u dawk relatati mal-qasam fl-Avviż ta’ kompetizzjoni.

L-EPSO qed jippjana li juża qafas ta’ kompetenzi ġdid mill-2023. Tista’ ssir taf aktar dwaru hawnhekk.

Ir-rwol ġenerali tal-amministraturi hu li jappoġġjaw lil dawk li jieħdu d-deċiżjonijiet biex iwettqu l-missjoni tal-istituzzjoni jew tal-korp tagħhom. Ħafna drabi l-gradwati jibdew il-karriera tagħhom bħala amministraturi fl-istituzzjonijiet Ewropew bil-grad AD 5. L-amministraturi impjegati f'dan il-grad jistgħu jagħmlu, taħt superviżjoni, tliet tipi ewlenin ta’ xogħol fl-istituzzjonijiet: il-formulazzjoni tal-politika, il-funzjoni operazzjonali, u l-immaniġġjar tar-riżorsi.

Id-dmirijiet ewlenin, li jistgħu jvarjaw minn istituzzjoni għal oħra, huma elenkati fl-Avviż ta’ Kompetizzjoni.

Tista’ wkoll tagħti daqqa t’għajn lejn is-sit web tagħna fejn issib aċċess għal informazzjoni utli dwar l-uffiċjali permanenti.

L-assistenti ġeneralment huma impjegati fi rwol eżekuttiv u tekniku (amministrattiv, finanzjarju, komunikattiv, ta' riċerka, ta' żvilupp u implimentazzjoni tal-politika, eċċ.). Jagħtu sehem importanti fl-immaniġġjar intern tal-Istituzzjonijiet, l-aktar fi kwistjonijiet baġitarji u finanzjarji, xogħol relatat mal-istaff, bil-kompjuters, u xogħol ta' mmaniġġjar ta' dokumenti u ta' laboratorju xjentifiku.

• Karriera ta’ assistent tkopri l-gradi AST 1 sa AST 11.
• Persunal ġdid normalment jibda fil-grad AST 1 jew AST 3.
• Il-kandidati AST 1 għandhom ikunu lestew l-edukazzjoni sekondarja u jkollhom esperjenza rilevanti preċedenti, jew ikollhom kwalifika professjonali rilevanti.
• Il-kandidati AST 3 ġeneralment ikunu lestew l-edukazzjoni sekondarja, ikollhom kwalifika vokazzjonali rilevanti u/jew esperjenza rilevanti ta’ diversi snin.

Is-Segretarji/Skrivani huma ġeneralment impjegati fi rwol ta' mmaniġġjar tal-uffiċċju u ta' appoġġ amministrattiv. Dawn jistgħu jaħdmu fuq firxa wiesgħa ta’ kompiti bħat-tħejjija tal-fajls, l-għoti tal-appoġġ għall-organizzazzjoni u l-koordinazzjoni tal-attivitajiet tad-dipartiment, l-immaniġġjar tad-dokumenti, kif ukoll bosta kompiti oħrajn li għandhom x'jaqsmu mal-appoġġ tat-timijiet, il-maniġers, jew servizzi oħra fi ħdan l-istituzzjonijiet tal-UE.

• Karriera ta' Segretarju/Skrivan tkopri l-gradi minn AST/SC1 sa AST/SC6.
• Staff ġdid normalment jidħol fil-gradi AST/SC 1 jew AST/SC 2.
• Il-kandidati AST/SC1 għandhom ikunu lestew l-edukazzjoni sekondarja u jkollhom esperjenza preċedenti rilevanti, jew ikollhom kwalifika vokazzjonali rilevanti.
• (Il-grad AST/SC2 xi kultant ikun disponibbli għal kandidati b’aktar esperjenza).

L-istituzzjonijiet tal-UE jagħżlu l-kandidati għall-kuntratti permanenti permezz ta' kompetizzjonijiet miftuħa. Dawn huma testijiet u eżerċizzji ta' evalwazzjoni maħsuba biex ikejlu l-ħiliet professjonali u għadd ta' kompetenzi ewlenin. Fid-dawl tal-għadd kbir ta' applikanti, din hi l-proċedura ta' selezzjoni l-iktar ġusta u trasparenti. Dan ifisser li l-applikazzjonijiet spontanji ma jistgħux jitqiesu.

L-istituzzjonijiet tal-UE jagħżlu l-kandidati għall-kuntratti permanenti permezz tal-organizzazzjoni ta' kompetizzjonijiet miftuħin. Kull waħda minn dawn il-kompetizzjonijiet titħabbar kemm bil-pubblikazzjoni tal-Avviż ta’ Kompetizzjoni f’Il-Ġurnal Uffiċjali tal-Unjoni Ewropea, kif ukoll fuq is-sit web tal-EPSO. L-Avviż tal-Kompetizzjoni fih deskrizzjoni sħiħa tal-profil imfittex, ir-rekwiżiti minimi fir-rigward tal-edukazzjoni (u xi kultant l-esperjenza tax-xogħol) u jindika t-testijiet u l-eżerċizzji l-oħrajn ta’ valutazzjoni (imfasslin biex ikejlu l-ħiliet professjonali tiegħek u numru ta’ kompetenzi ewlenin) li se jsiru matul il-kompetizzjoni. L-Avviż tal-Kompetizzjoni jinkludi wkoll informazzjoni u struzzjonijiet dwar kif tapplika għall-kompetizzjoni miftuħa. B’mod ġenerali, l-Avviż ta’ Kompetizzjoni hu ppubblikat fl-ewwel jum tal-perjodu ta’ applikazzjoni.

Fid-dawl tan-numru kbir ta' applikanti, l-EPSO jqis li dan hu l-metodu l-aktar ġust u trasparenti għall-proċeduri ta' selezzjoni. Għaldaqstant, ma jistgħux jitqiesu applikazzjonijiet spontanji.

Kull proċedura ta’ selezzjoni (kompetizzjoni) għall-uffiċjali permanenti tal-UE għandha l-bord ta’ selezzjoni tagħha stess. Kull bord ta’ selezzjoni huwa magħmul minn uffiċjali mill-istituzzjonijiet u l-korpi tal-UE servuti mill-EPSO. L-uffiċjali jingħaqdu mal-Bord ta’ Selezzjoni fuq bażi volontarja, wara sejħa apposta għal interess. Il-membri tal-bord ta’ selezzjoni jiġu nnominati formalment mill-organizzazzjoni tal-oriġini tagħhom. Ma għandu jkollhom l-ebda kunflitt ta’ interess fir-rigward tal-kompetizzjoni tagħhom sabiex jiġu kkonfermati bħala membri tal-bord ta’ selezzjoni.

Fil-każ ta’ kompetizzjonijiet ippubblikati sal-31 ta’ Diċembru 2022, il-bordijiet ta’ selezzjoni jikkonsistu, b’mod ġenerali, minn membri permanenti u membri mhux permanenti. Il-membri permanenti huma uffiċjali tal-UE ssekondati mal-EPSO mill-organizzazzjonijiet ta’ oriġini tagħhom normalment għal perjodu ta’ 2 jew 4 snin. Il-membri mhux permanenti huma uffiċjali tal-UE li jinħatru mill-organizzazzjonijiet ta’ oriġini tagħhom għal kompetizzjoni partikolari għall-għarfien espert tekniku jew lingwistiku tagħhom, pereżempju. Fil-każ ta’ kompetizzjonijiet ippubblikati wara l-1 ta’ Jannar 2023, il-bordijiet ta’ selezzjoni m’għadhomx jinkludu membri permanenti b’mod sistematiku. Gradwalment, il-bordijiet ta’ selezzjoni se jkunu magħmula minn membri mhux permanenti biss.

Il-membri nnominati tal-bord ta’ selezzjoni huma mħarrġa dwar il-metodoloġiji tal-għażla u tal-valutazzjoni qabel ma jibdew jaqdu dmirijiethom u jkomplu jirċievu taħriġ u gwida speċifiċi mit-tim ta’ psikologi tal-EPSO matul l-istadji differenti tal-kompetizzjoni tagħhom.

Il-bordijiet ta’ selezzjoni jiddeċiedu dwar id-diffikultà tal-eżamijiet tal-kompetizzjoni u japprovaw il-kontenut tagħhom, jevalwaw il-konformità tal-kandidati mal-kriterji speċifiċi ta’ eliġibbiltà, iqabblu l-merti tal-kandidati, u jagħżlu l-aħjar kandidati fid-dawl tar-rekwiżiti stabbiliti fl-avviż tal-kompetizzjoni. Il-proċedimenti tal-bordijiet ta’ selezzjoni huma sigrieti u l-ħidma tagħhom hija ffaċilitata mill-EPSO.

Karriera ta' amministratur tkopri l-gradi minn AD 5 sa AD 16. 

B’mod ġenerali, AD 5 hu l-livell tad-dħul għall-gradwati universitarji. Fil-biċċa l-kbira tal-każijiet, mhi meħtieġa ebda esperjenza professjonali.

Is-selezzjoni u r-reklutaġġ jistgħu jiġu offruti wkoll fil-gradi AD 5 / AD 6/ AD 7 għal rwoli aktar speċjalizzati. Tkun meħtieġa esperjenza rilevanti ta’ diversi snin. 

AD 9 / AD 12 hu l-livell ta’ maniġment intermedju. Is-selezzjoni/ir-reklutaġġ f'dawn il-gradi jirrikjedi esperjenza preċedenti ta' maniġment.